Azərbaycan, Bakı, 14 may / Trend , müxbir Ü.İsmayılova/
Azərbaycanın Torpaq və Kartoqrafiya üzrə Dövlət Komitəsi torpaq sahəsini xüsusi icazə almadan genişləndirən şəxslərə qarşı cəza tədbirlərini sərtləşdirmək niyyətindədir. Bu barədə cümə axşamı komitə rəhbəri Qərib Məmmədov deyib.
"Belə faktlar uzə çıxarıldıqda və qeyri-qanuni mənimsənilən torpaq sahəsi bir və ya iki sotdan artıq omadığı halda elə sahibinə hərrac yolu ilə satılacaq", - Məmmədov qeyd edib.
Azərbaycan Prezidentinin 10 dekabr 2008-ci il fərmanına əsasən, bələdiyyələrin nəznində olan torpaqlar yalnız hərrac və müsabiqə yolu ilə satıla bilər. Hərrac və müsabiqələrin keçirilməsi səlahiyyəti isə Torpaq və Kartoqrafiya üzrə Dövlət Komitəsinə verilir. Əvvəllər bu səlahiyyət bələdiyyələrə aid idi.
Məmmədovun sözlərinə əsasən, qanundankənar faktların üzə çıxarılması üçün hazırda komitə mütəxəssisləri tərəfindən monitorinqlər keçirilir.
"Hər bir belə fakt dövlət torpağının özbaşına zəbt edilməsi deməkdir", - Məmmədov deyib.
Dövlət komitəsi mütəmadi olaraq torpağın hər santimetrini təhlil edir və Nazirlər Kabinetinə hər il "torpaq balansı" hesabatı verir. "Torpaq balansında dövlətin hər santimetr torpağının hansı formada istifadə edildiyi barədə informasiya əksini tapır", - Məmmədov əlavə edib.
Azərbaycanda üç növ torpaq mülkiyyəti var: dövlət torpaqları, bələdiyyə torpaqları və özəl mülkiyyət.
Məqalə müəllifi ilə əlaqə ünvanı: [email protected]