Azərbaycan, Bakı, 18 iyun / Trend , müxbir N.İsmayılova /
"Royal Bank Azərbaycan Mərkəzi Bankının nəzdində fəaliyyət göstərən Azərbaycan İpoteka Fondunun (AİF) vəsaitləri hesabına ipoteka kreditinin verilməsi haqda ərizələrin nəzərdən keçirilməsinə başlayıb və bu ay onların verilməsinə start verəcək", - cümə axşamı bankdan deyilib.
"Hazırda biz əhalidən 13 ərizə almışıq və maliyyələşdirməyə artıq bu ay başlayacağıq", - bankdan bildirilib.
AİF xətti ilə ipoteka krediti portfeli 1 milyon manat təşkil edir.
Bankdan deyilib ki, bank özünün ipoteka proqramını da davam etdirir.
2009-cu ildə sosial ipotekanın maliyyələşdirilməsi üçün dövlət büdcəsində 14,5 mln. manat nəzərdə tutulub. AİF nominal dəyəri 1000 manat olan 55 min ədəd ipoteka istiqrazlarını qeydiyyatdan keçirib. Emissiyanın ümumi həcmi 55 milyon manat təşkil edir. Onlardan 15 milyon manatı artıq yerləşdirilib.
Ölkədə ipoteka kreditləşməsi 25 mart 2006-cı ildə AİF standartlarına əsasən başlanılıb. 7 fevral 2007-ci ildən isə sosial ipotekanın verilməsinə başlanılıb. İpoteka kreditinə tələbat dövlət tərəfindən ayırmaları arxada qoyduğundan 2007-ci ilin iyunundan etibarən AİF öz standartları ilə maliyyələşməni dayandırıb. Azərbaycanın 2005-2008-ci illər üzrə dövlət büdcəsində AİF vasitəsilə ipotekanın maliyyələşdirilməsi üçün 94 milyon manat nəzərdə tutulub. Bu məbləğin 68 mln. manatı banklar vasitəsilə artıq verilib. AİF standartları ilə kredit portfeli 75 milyon manat, bankların ümumi ipoteka krediti portfeli isə 250-300 milyon manat təşkil edir.
Kreditlər üzrə faizlər kommersiya banklarında 8 - 20 faiz arasında dəyişir. Kredit müddəti 10 - 25 ildir. Məbləğin maksimum həcmi 50 min manatdır və onun həcmi kreditin hansı müddətə - 3 - 25 il müddətinə verilməsindən asılıdır. Fondun 17 agent bankı var.
İyunun 18-nə olan rəsmi məzənnə 0,8039 AZN/USD təşkil edir.
Məqalə müəllifi ilə əlaqə ünvanı: [email protected]
