Azərbaycan, Bakı, 29 iyun / Trend , müxbir Ü.İsmayılova /
"Azərbaycanda ipoteka krediti üzrə borc alanların həyat və əmək qabiliyətliliyinin sığortalanması həm borc alan, həm də banklar üçün sərfəlidir", - "Az Sigorta" şirkətinin xüsusi jurnalına müsahibəsində şirkətin mütəxəssisi Pərvin Məmmədova deyib.
"Borc alan əmək qabiliyyətini itirirsə, yaxud əlil olursa, o, ipoteka krediti üzrə aldığı obyekti boşaltmalıdır. Ancaq borc alanın həyatı və obyektin sığortalanması zamanı belə problem olmur", - Məmmədova bildirib.
Onun sözlərinə görə, belə olan halda bank kompensasiya kimi sığortaçıdan ipoteka krediti üzrə ödənilməli məbləğin qalan hissəsini ala və mənzili sığorta edənin adına qeydiyyatdan keçirə bilər ki, bu da borc alanın həyatının sığortalanmasının qaçılmaz olduğunu göstərir. Borc alan gənc və sağlam insandırsa, bu, sığorta hadisəsi ehtimalını minimallaşdırır ki, hətta bundan qazanmaq da olar. Çünki sığortaçılar belə müştərilərə aşağı tariflər təklif edir.
"Ancaq belə olan halda da sığorta müqaviləsi ilə diqqətlə tanış olmaq lazımdır", - Məmmədova hesab edir.
Onun fikrincə, ipoteka kreditləşməsinin vacib məqamlarından biri ipoteka obyektinin yanğın, partlayış, subasma, fors-major və başqa hallardan sığortalanmasıdır. Sığortanın bu növü də həm bank, həm də borc alan üçün sərfəlidir.
İpoteka obyektində sığorta hadisəsi baş veribsə və obyekt sığortalanmayıbsa, bank uduzur. Yəni borc alan ödəmələrdən imtina edə və onu banka aşağı qiymətlə qaytara bilər. Ancaq borcun böyük hissəsi ödənilibsə, borc alan onu özü ödəməlidir.
İpoteka obyekti sığortalanıbsa və dəyən zərər böyük deyilsə, sığortaçı sığorta edənə ödəmələr edir. Zərər böyük olduqda bank sığortaçıdan borcun tam ödənilməsini tələb edir.
"Borc alan sığortaçını seçərkən diqqətli olmalı və təklif olunan sığorta müqavilə və tariflərini müqayisə etməlidir", - Məmmədova hesab edir.
Azərbaycan Mərkəzi Bankı nəzdində Azərbaycan İpoteka Fondu 2009-cu il iyunun 1-dən etibarən ipoteka kreditlərinin maliyyələşdirilməsini bərpa edib. Fondun sığorta agentlərinin sırasına daxil edilib: Azersigorta, Alfa Sigorta, Atasigorta, Atesgah Sigorta, Başak-İnam Sigorta, Beynəlxalq Sigorta, MBASK, Paşa Sigorta, Standard Insurance, Baki Sigorta.
Məqalə müəllifi ilə əlaqə ünvanı: [email protected]
