Azərbaycan, Bakı, 16 iyul / Trend , müxbir Ü. İsmayılova/
Ərzaq məhsullarında gen dəyişiklikli orqanizmlərin (GDO) mövcudluğunun araşdırılması üçün Azərbaycanın Azad İstehlakçılar Birliyi (AİB) yanında xüsusi işçi qrupu yaradılıb. Bu barədə cümə axşamı mətbuat konfransında AİB-in rəhbəri Eyyub Hüseynov məlumat verib.
"Azərbaycanda kənd təsərrüfatı məhsullarının əksəriyyətində GDO əlavəsi var", - Hüseynov deyib.
Onun sözlərinə görə, kartofun və buğdanın 50, pomidorun, çuğundurun və yemişin 70, qarğıdalının 80, qarpızın 98, soğanın 99 faizi gen dəyişikliklidir.
"Hazırda İranda gen mühəndisliyinin köməyi ilə məhsul yetişdirilməsi üzrə elmi araşdırma aparılır və bu məhsullar Azərbaycan bazarına çıxarılır", - Hüseynov deyib.
Birliyin rəhbəri məhsullarda bu əlavənin mövcudluğunu üzə çıxaracaq və sənədlə təsdiq edəcək laboratoriyanın yaradılması təklifi ilə çıxış edib.
"AİB artıq bu təkliflə Azersun Holding şirkətinə (Azərbaycanda iri ərzaq məhsulları istehsalçısı) müraciət edib və şirkət artıq belə laboratoriyanın inşasına razılıq verib", - Hüseynov deyib.
Onun sözlərinə görə, ən azı üç məhsulda GDO mövcudluğunu aşkara çıxaran avadanlıq 70 min dollardır. Yalnız mövcudluğu və ya olmamağı göstərən ən sadə avadanlıq isə 9 min dollardır.
Məqalə müəllifi ilə əlaqə ünvanı: [email protected]
