Azərbaycan, Bakı, 14 avqust / Trend , müxbir N.İsmayılova /
"İqtisadi Araşdırmalar Mərkəzi" QHT-nin hesablamalarına görə, Azərbaycanda son on il ərzində ilk dəfə müşahidə olunan deflyasiyanın səviyyəsi yeddi ayın yekununa görə 3,01 faiz olub. Bu barədə cümə günü mərkəzdən yayılan məlumatda deyilir.
Araşdırmalar Macarıstanın "Açıq Cəmiyyət İnstitutu" institutial yardım fondunun maliyyələşdirdiyi "Alternativ inflyasiyanın səviyyəsinin hesablanması" üzrə aparılır.
Hesabat dövrü ərzində daha çox ərzaq məhsulları ucuzlaşıb - 5,28 faiz. Qeyri-ərzaq məhsullarının qiyməti 3,96 faiz enib, xidmətlərin tarifləri isə 4,4 faiz bahalaşıb.
Keçən ilin anoloji dövrü ilə müayisədə iyulda ölkədə istehlak qiymətlərinin indeksi 3,16 faiz azalıb. Bununla da ərzaq məhsullarına illik deflyasiya 7,17 faiz, qeyri-ərzaq məhsullarına isə 2,54 faiz təşkil edib. Son il ərzində xidmət tarifləri 7,28 faiz bahalaşıb.
İyul ərzində Azərbaycanda istehlak qiymətlərinin indeksi 0,59 faiz artıb. Bakıda 0,47 faiz, regionlarda isə 0,71 faiz səviyyəsində inflyasiya müşahidə olunub.
İyul ərzində qeyri-ərzaq məhsullarında 0,16 faiz səviyyəsində deflyasiya müşahidə olunub. İyul ərzində qida məhsullarının qiyməti 0,86 faiz ucuzlaşıb, xidmətlərin tarifləri isə 4,45 faiz bahalaşıb. Tariflərin belə bahalaşmasını mərkəzin ekspertləri iyulun 1-dən əhaliyə verilən qazın qiymətinin iki dəfə qalxması ilə izah edirlər.
Məlumatda deyilir ki, iyulda ərzaq məhsullarından daha əhəmiyyətli dərəcədə meyvə və tərəvəzin qiyməti ucuzlaşıb - 3,14 faiz. Süd, süd məhsulları və yumurtanın qiyməti isə 4,13 faiz qalxıb.
Məqalə müəllifi ilə əlaqə ünvanı: [email protected]