Azərbaycan, Bakı, 24 avqust / Trend , müxbir Ü.İsmayılova /
Naxçıvan Muxtar Respublikasının Dövlət Gömrük Komitəsi "donuz qripi"nin (A/H1N1) profilaktikası məqsədilə respublikanın nəzarət-buraxılış məntəqələrində tədbirlər keçirir. Bu barədə Gömrük Komitəsinin altı aylıq fəaliyyətinin yekunlarına həsr olunmuş kollegial iclasda komitə rəhbəri Asəf Məmmədov deyib.
"Virus aşkarlanan ölkələrdən gələn sərnişinlər və nəqliyyat vasitələri xüsusi gömrük nəzarətindən keçirlər", - Məmmədov deyib.
Onun sözlərinə görə, profilaktik iş çərçivəsində Dövlət Komitəsinin əməkdaşları A/H1N1 virusu aşkarlanan ölkələr barədə müntəzəm məlumat alırlar. DGK NMR-in Səhiyyə Nazirliyinin mütəxəssisləri ilə müntəzəm məsləhətləşmələr aparır. Muxtar Respublikanın nəzarət buraxılış məntəqələri tibbi müayinə işlərini, dezinfeksiya baryerlərinin keçirilməsini gücləndirib.
"Həmçinin Amerika qitəsindən ölkəyə ət məhsullarının gətirilməsinin qarşısının alınması üzrə ciddi təbirlərə başlanılıb", - Məmmədov deyib.
İyulda Azərbaycanda "donuz qripi"nə iki yoluxma faktı qeydə alınıb, iyulun 27-də Fransadan qayıdan Bakı və iyulun 29-da Böyük Britaniyadan qayıdan Gəncə sakinlərində virus aşkarlanıb.
A virusunun əsas simptomları bunlardır: yüksək hərarət, öskürək, boğaz ağrısı, zökəm və ya burunun tutulması, bədəndə ağrılar, baş ağrısı, üşütmə və halsızlıq. Virusa yoluxmuş insanların böyük əksəriyyətində həm də diareya və ürəkbulanma qeydə alınır.
Məqalə müəllifi ilə əlaqə ünvanı: [email protected]