Azərbaycan, Bakı, 26 avqust / Trend , müxbir İ.Хəlilova /
Beynəlxalq İnkişaf Assosiasiyası (BİA Dünya Bankı qrupuna daxildir) 2010-cu ildə Azərbaycandakı layihələrin güzəştli kreditləşdirilməsini davam etdirmək haqqında qərar qəbul edib. Bu barədə çərşənbə günü bankın Bakı nümayəndəliyindən deyilib. [Ancaq bir müddət əvvəl bildirilirdi ki, DB 2009-cu ildən etibarən vəsaitləri daha kasıb ölkələrə, əsasən də Afrika ölkələrinə yönəltmək məqsədi ilə Azərbaycanın güzəştli şərtlərlə maliyyələşdirilməsini dayandıracaq.]
"İyulun 1-dən başlayan 2010-cu maliyyə ilində güzəştli kredit alıcıları olan ölkələrin maliyyələşdirilmə həcmi hələ dəqiqləşdirilir, buna görə də Azərbaycan üçün büdcə də hələ müəyyən edilməyib", - nümayəndəlikdən deyilib.
BİA 2009-cu ildə ölkə üçün 70 milyon dollar ayırıb və bu vəsait iki layihə arasında bölünüb. Onun böyük hissəsi (62 milyon dollar) Hacıqabul-Bəhramtəpə avtomobil yolunun tikintisi və yenidənqurması layihəsinə ayrılıb. Layihə çərçivəsində 116 kilometr uzunluğa malik Hacıqabul-Bəhramtəpə avtomobil yolunun, həmçinin 200 kilometr uzunluğunda yerli əhəmiyyətli yolların tikintisi və yenidənqurması nəzərdə tutulub. Səkkiz milyon dollarlıq ikinci güzəştli kredit, böyük infrastruktur layihələrini realizə edən dövlət strukturları və müəssisə əməkdaşlarının potensialının gücləndirilməsi layihəsinin realizəsinə yönəldiləcək.
2008-ci maliyyə ilində ölkə hökuməti DB-dən altı güzəştli kredit ala bilib. Bu layihələr aşağıdakılardır: Azərbaycanın korporativ və dövlət sektorunda hesabatlılıq (CAPSAP) layihəsi; təhsil sistemində islahatların üçüncü mərhələsi; kanalizasiya və su təchizatı sisteminin inkişafı; sosial təminata yardım; məcburi köçkünlərin sosial inkişafı; Azərbaycanın kənd təsərrüfatı sərmayələri. Onların realizəsinə 121 milyon dollar ayrılıb.
Adambaşına düşən ÜDM-in həcmi 1280 dolları ötən ölkələr bu meyara uyğun gəlir. Artıq Azərbaycan bu rəqəmi arxada qoyub və bu səbəbdən də maliyyələşdirməni yalnız kommersiya şərtləri üzərində almağı planlaşdırırdı. Azərbaycanda adambaşına düşən ÜDM-in həcmi 5403,9 dollar təşkil edib.
Azərbaycan 1992-ci ildən Dünya Bankının üzvüdür. Əməkdaşlıq dövründə ölkədə bank tərəfindən 47 layihəyə 2,5 milyard dollar ayrılıb. Yalnız 2008-ci maliyyə ilində bank 13 layihəyə 1,251 milyard dollar ayırıb ki, bu da iki il ərzində dörd illik büdcənin mənimsənilməsi deməkdir. DB qarşıdakı iki il üçün (2009-10-cu illər) ölkəyə Beynəlxalq Yenidənqurma və İnkişaf Bankının xətti ilə kommersiya şərtləri ilə bir milyard dollardan çox vəsait ayırmağa hazır olduğunu bildirib. Hələ ki, 2009-cu maliyyə ilində iki layihəyə 175 milyon dollar ayrılıb. Onun 70 milyon dolları güzəştli şərtlərlə verilib.
Məqalə müəllifi ilə əlaqə ünvanı: [email protected]
