Azərbaycan, Bakı, 04 sentyabr / Trend , müxbir N.İsmayılova /
Azərbaycan İqtisadi İnkişaf Nazirliyi yanında Sahibkarlığa Kömək Milli Fondu sentyabrın 4-də Gəncə-Qazax iqtisadi rayonunun Tovuz şəhərində "Ölkənin regionlarında sahibkarlığın inkişafına dövlət dəstəyi" mövzusunda tədbir keçirib. Bu barədə cümə günü nazirlikdən verilən məlumatda deyilir.
Tədbir iştirakçıları "Naiqin Ko. Tovuz-Baltiya" MMC-nin üzümçülüyün inkişafı və spirtli içkilərin istehsalı sahəsinin genişləndirilməsi məqsədi ilə saldığı üzüm bağlarına və yaradılmış istehsal sahəsinə baş çəkiblər. Fonddan alınmış güzəştli kreditlər hesabına 68 hektar sahədə üzüm bağları salınıb, İtaliya və Fransadan müasir texnoloji avadanlıqlar gətirilib. Hazırda "Naiqin Ko. Tovuz-Baltiya" MMC-də istehsal olunan məhsulların 95%-i Rusiya, Ukrayna, Latviya və Polşaya ixrac olunur. Bir çox beynəlxalq sərgilərdə iştirak etmiş müəssisənin istehsal etdiyi məhsullar yüksək mükafatlara layiq görülüb.
İştirakçılar həmçinin Tovuz rayonunda tenderdə qalib gəlmiş "Azer Aqro LTD" şirkəti tərəfindən aparılan soyuducu anbar kompleksinin inşasının gedişi ilə də tanış olublar. Ümumilikdə Milli Fond tender çərçivəsində 12 təklifin maliyyələşdirilməsini bəyənib. Onlardan altı layihə Quba-Xaçmaz rayonunda, dördü Aranda, biri Gəncə-Qazax, biri isə Lənkəran iqtisadi rayonundandır.
Tədbirdə fondun vəsaiti hesabına altı səlahiyyətli kredit təşkilatı vasitəsilə Tovuz, Qazax, Ağstafa və Şəmkir rayonlarının sahibkarlarına 100-dən çox kredit verilib. Güzəştli kreditlər vasitəsilə layihələrin maliyyələşdirilməsi 100-dən çox yeni iş yerlərinin açılmasına kömək edəcək.
Beləliklə, cari ilin əvvəlindən Milli Fond səlahiyyətli kredit təşkilatları vasitəsilə 1250 sahibkara 66 milyon manatlıq kreditlər verib. Layihələrin güzəştli kreditlər vasitəsilə maliyyələşdirilməsi 5000-dən çox yeni iş yerlərinin açılmasına kömək edəcək.
Fond tərəfindən "Sahibkarlığa Kömək Milli Fondunun vəsaitləri hesabına güzəştli kreditlərin verilməsi üçün sahibkarlıq subyektləri tərəfindən təqdim edilən investisiya layihələrinin hazırlanması və qiymətləndirilməsi" mövzusunda treninq keçirilib. Sahibkarlar tərəfindən təqdim edilmiş investisiya layihələrinin qiymətləndirilməsi, biznes-planın təşkili proseduru, güzəştli kreditin alınması qaydalarına həsr olunmuş treninqdə 200-dən çox sahibkar iştirak edib.
Sentyabrın 04-nə olan rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]
