Azərbaycan, Bakı, 17 sentyabr / Trend , müxbir Ü.İsmayılova /
Azərbaycanın Auditorlar Palatası bu günlərdə beynəlxalq audit standartlarının ingilis dilindən Azərbaycan dilinə tərcüməsi, həmçinin onların redaktəsi üzrə işləri başa çatdırır. Bu barədə cümə axşamı palatanın rəhbəri Vahid Novruzov deyib.
"Güman edirəm ki, Azərbaycanda beynəlxalq audit standartlarının tam tətbiqinə gələn il başlanacaq", - Novruzov deyib.
Onun sözlərinə görə, beynəlxalq audit standartlarının tətbiqi Dünya Bankında (DB) CAP/SAP proqramı çərçivəsində qrant ayrıldıqdan sonra həyata keçiriləcək.
"Əgə DB vəsait ayırmasa, biz öz vəsaitlərimiz hesabına bu işi həyata keçirəcəyik", - Novruzov deyib.
DB Azərbaycanın Auditorlar Palatasına "Korporativ və dövlət sektorunda mühasibat işinin təkmilləşdirilməsi" layihəsi çərçivəsində ümumi dəyəri 24 milyon dollar olan əlavə qrant ayıracaq.
Layihə DB-nin 11 milyon dollarlıq krediti hesabına, bundan əlavə PHRD Yaponiya fondunun 3 milyon dollarlıq, İsveçrənin İqtisadi Məsələlər üzrə Dövlət Katibliyinin (SECO) 2 milyon dollarlıq, Azərbaycan hökumətinin isə 8 milyon dollarlıq qrantı hesabına reallaşacaq.
Layihəyə görə, 6 milyon dolların kommersiya sektorunda IFRS-in tətbiqinə, 10 milyon dolların IPSAS-ın (International Public Sector Accounting Standards), daxili maliyyə nəzarəti və dövlət sektorunda xarici auditin yaxşılaşmasına, həmçinin 9 milyon dolların mühasibat işi və audit idarə sisteminin yaxşılaşması yönəldilməsi güman edilir. SECO-nun vəsaiti dövlət gəlirlərinin idarəsi üzrə daxili maliyyə nəzarətinin təkmilləşdirilməsinə yönəldiləcək.
Azərbaycan artıq kommersiya sektoru üçün 28 milli standart hazırlayıb. Dünyada maliyyə hesabatının və auditin 35 standartı mövcuddur. Ölkədə dövlət sektoru üçün IFRS-ə keçidə 2008-ci il yanvarın 1-dən başlanıb.
Azərbaycanın Auditorlar Palatası 1995-ci ilin sentyabrında təsis edilib, aktiv fəaliyyətə isə 1996-cı ilin aprelindən başlayıb. Azərbaycanda "Auditor fəaliyyətləri haqqında" qanun 1994-cü ildə qəbul edilib.
Məqalə müəllifi ilə əlaqə ünvanı: [email protected]
