Azərbaycan, Bakı, 23 sentyabr / Trend , müxbir İ.Xəlilova /
Azərbaycan bankı Texnikabank xarici banklarla bankın pul köçürmələri portfelinin sekyuritizasiyasının təşkili mövzusunda danışıqlara başlayıb. Bu barədə çərşənbə günü Texnikabankın İdarə Heyətinin sədri Samir Hüseynov deyib. Texnikabank dünya kapital bazarında avrobondların yerləşdirilməsində olduğu kimi, Azərbaycanın bank bazarında sekyuritizasiyanı həyata keçirəcək ilk bank olacaq.
"2009-cu ilin səkkiz ayı ərzində Texnikabankın sürətli pul köçürmələri üzrə portfeli 94 milyon dollar təşkil edib, ilin sonunadək onun 140-150 milyon dollara çatacağı gözlənilir ki, bu da sözügedən portfeli sekyuritiləşdirməyə imkan verir", - Hüseynov deyib.
Onun sözlərinə görə, bu ilin ikinci yarısından vəziyyətin sabitləşməyə başlamasına baxmayaraq, dünya böhranı pul köçürmələrinin həcminə təsir edib. Ötən ilin yekunlarına görə, Texnikabank vasitəsilə 167 milyon dollarlıq pul vəsaiti köçürülüb.
"Bir ay ərzində 12 milyon dollarlıq köçürmələrin həyata keçirildiyini nəzərə alaraq, 2009-cu ilin sonunadək pul köçürmələri portfelinin daha 48 milyon dollar artacağını gözləmək olar", - Hüseynov deyib.
Bir müddət əvvəl Texnikabank ipoteka portfelinin sekyuritizasiyası planları barədə bildirmişdi, lakin Hüseynovun qeyd etdiyi kimi, bank tərəfindən verilmiş 50 milyon manat məbləğində ipoteka kreditlərinin indiki həcmi ilə bunu etmək mümkün deyil.
"Bununla əlaqədar olaraq sözügedən mərhələdə biz pul köçürmələri portfelini seçdik, çünki sekyuritizasiya prosesi birbaşa kreditləşmədənsə, daha qəbul edilən şərtlərlə vəsaitin cəlb edilməsinə imkan verir", - bank rəhbəri deyib.
Onun fikrincə, sözügedən sekyuritizasiya çərçivəsində 50 milyondan 100 milyon dollaradək vəsait cəlb edilə bilər, lakin şərtlər vəsaitin cəlb edilməsi zamanı xarici kapital bazarlarındakı vəziyyətdən asılı olacaq.
Texnikabank ölkənin bank bazarında 1993-cü ildən fəaliyyət göstərir və 2007-ci ilədək 100 faizlik Azərbaycan bankı kimi qalıb. Hazırda bankın majoritar səhmdarı kimi World Wines şirkəti çıxış edir. Şirkət səhmlərin 75 faizinə malikdir. Bankın Müşahidə Şurasının sədri Etibar Əliyev səhmlərin 15 faizinə, ABŞ-ın Kazimir Investment Caspian Fund şirkəti isə 10 faizinə nəzarət edir.
Sentyabrın 23-nə olan rəsmi məzənnə 0,8032 AZN/USD təşkil edir.
Məqalə müəllifi ilə əlaqə ünvanı: [email protected]