Azərbaycan, Bakı, 03 oktyabr / Trend , müxbir Ü.İsmayılova/
Kənd təsərrüfatı nazirinin müavini İlham Quliyev cümə günü bildirib ki, 2010-cu ildə kənd təsərrüfatının dövlət büdcəsindən maliyyələşdirilməsinin həcmi 2009-cu ildəki qədər olacaq.
O deyib ki, gələn il kənd təsərrüfatı məhsulu istehsalçılarına 10 milyon manat həcmində kredit ayrılacaq.
2007-ci ildən başlayaraq bu günədək fermerlərin büdcə vəsaitləri hesabına maliyyələşdirilməsinə hər il 5 milyon manat vəsait ayrılıb.
2007-ci ildən başlayan bu güzətli kreditlər Texnikabank, Turanbank, Rabitəbank, MuğanBank, ZaminBank, Bank of Azerbaijan, Gəncəbank, Azərbaycan Sənaye Bankı və İKA (İcraçı Kredit Agentliyi) vasitəsilə paylaşdırılır.
Mikrokreditlər büdcə vəsaitləri hesabına iki il müddətinə min manata qədər, kiçik kreditlər min manatdan on min manata qədər, orta kreditlər 3 il müddətinə 20 min manatdan 50 min manata qədər, böyük kreditlər isə beş il müddətinə 50 min manatdan 200 min manata qədər məbləğdə verilir. Kredit faizi sahibkarlığa dəstək üçün milli valyuta fondunda olduğu kimi yeddi faiz təşkil edir.
Azərbaycan Nazirlər Kabinetinin qərarı ilə kreditlər kənd təsərrüfatı məhsullarının istehsalına, suvarma ərazilərinin meliorasiyasının yaxşılaşdırılmasına, suni suvarma avadanlıqları ilə təmin olunmağa, qida sənayesi sektorunun inkişafına, Kənd Təsərrüfatı Nazirliyinin pilot layihələrinin həyata keçirilməsinə və heyvandarlıqda süni mayalanmanın inkişafına yönəldilə bilər.
Bu gün heyvandarlığın inkişafına xüsusi diqqət yetirilir. Belə ki, bu, çox gəlirli sahə hesab olunur. Kredit alan fermerlər bir-iki il müddətində bu kreditləri qaytara bilirlər. Üzümçülük isə öz bəhrəsini yalnız 4-5 ildən sonra verir.
Məqalə müəllifi ilə əlaqə ünvanı: [email protected]
