Azərbaycan, Bakı, 26 oktyabr / Trend , müxbir Ü.İsmayılova/
Yanvar-sentyabr aylarında Azərbaycanda 65 639 daşınmaz əmlak obyekti qeydiyyatdan keçib. Bu barədə Əmlak Məsələləri Dövlət Komitəsindən bazar ertəsi yayılan məlumatında deyilir.
2009-cu ilin yanvar-sentyabr ayları ərzində respublika üzrə 65 639 daşınmaz əmlak obyekti üzərində mülkiyyət hüquqları qeydiyyata alınıb. Bunlardan 22,55 mini ilkin, 43,09 mini isə təkrar qeydiyyat olub. Üzərində mülkiyyət hüquqlarının qeydiyyatı aparılan əmlaklardan 12,14 mini fərdi yaşayış və bağ evi, 25,14 mini mənzil, 22,40 mini torpaq sahəsi, 3,29 mini qeyri-yaşayış sahəsi, 291-i əmlak kompleksi, 6-sı çoxmərtəbəli yaşayış binası, 365-i çoxillik əkin sahəsi təşkil edib.
Bundan əlavə, hesabat müddətində 9,936 min ipoteka müqaviləsi, 529 icarə dövlət qeydiyyatına alınıb.
Doqquz ay ərzində 63,426 min daşınmaz əmlakın texniki inventarlaşdırılması aparılaraq, texniki pasport və 41,597 min daşınmaz əmlak obyektinə müayinə aktı tərtib edilib.
Hüquqi və fiziki şəxslərə 45,54 min məhdudiyyət arayışı, əhaliyə xidmətlə bağlı 17,983 min müxtəlif məzmunlu arayışlar verilib.
2009-cu ilin yanvar-sentyabr ayları üzrə Əmlak Məsələləri Dövlət Komitəsinə 6486,6 min manat xidmət haqqı, 3593,9 min manat dövlət rüsumu daxil olub.
Məqalə müəllifi ilə əlaqə ünvanı: [email protected]
