Azərbaycan, Bakı, 30 oktyabr / Trend , müxbir E.İsmayılov/
Bakı metropoliteni dekabrda "28 May" stansiyasında Salatın Əsgərova küçəsinə əlavə çıxışın istismara verilməsini planlaşdırır. Bu barədə cümə günü metropolitendəki mənbədən bildirilib.
"Hazırda işlər davam edir və bu ilin dekabrında əlavə çıxışın istismara verilməsi planlaşdırılır", - mənbədən deyilib.
Həmçinin, hazırda "28 May" stansiyası ərazisində Bakı metropoliteninin inzibati binası inşa edilir. Binada texnoloji korpus, ATS və Bakı metropoliteninin dispetçeri yerləşəcək. Mənbədən deyilənə görə, bu binanın 2011-ci ilin əvvəlinə istismara verilməsi planlaşdırılır. "Yeni texnologiya binasının istismara verilməsi lazımı maliyyələşdirmənin nə zaman alınmasından asılı olacaq", - mənbədən bildirilib.
Mənbənin bildirdiyi kimi, növbəti ilin əvvəlində Bakı Dövlət Universiteti yaxınlığında "Elmlər Akademiyası" stansiyasının əlavə çıxışının inşasına başlamaq planlaşdırılır. "Əlavə çıxış layihəsi artıq hazırdır, növbəti ilin əvvəlində tikinti işlərinə başlamaq planlaşdırılır", - mənbə əlavə edib.
2010-cu ilin əvvəlində Bakı metropoliteni, həmçinin "İçərişəhər", "Sahil", "Nizami" və "Xətai" metrostansiyalarında da əlavə çıxışların layihələndirilməsi üzrə tender elan edəcək.
Bakı metropoliteni 1967-ci ildən etibarən fəaliyyət göstərir və 21 stansiyası var. Bu ilin sonunadək sayca 22-ci stansiyanın istismara verilməsi planlaşdırılır. Yaxın zamanlarda "Müşfiq" və "Cavadxan" stansiyalarının inşasına başlamaq gözlənilir. Bakı metropolitenin 20 illik inkişaf proqramı çərçivəsində daha 40 yeni stansiyanın inşası planlaşdırılır.
Məqalə müəllifi ilə əlaqə ünvanı: [email protected]