Azərbaycan, Bakı, 10 noyabr / Trend , müxbir N.İsmayılova/
Vergilər Nazirliyinin oktyabrda keçirdiyi operativ nəzarət tədbirləri zamanı 1807 vergi ödəyicisində qanunvericiliyin pozulması faktları aşkar edilib. Bu barədə nazirliyin məlumatında deyilir.
Bu zaman 1071 vergi ödəyicisində nağd hesablaşmaların aparılması qaydalarının pozulması, 119 vergi ödəyicisində valyuta sərvətlərinin ödəniş vasitəsi kimi qəbul edilməsi və valyuta sərvətlərinin ticarət, iaşə və xidmət müəssisələrində qanunvericiliklə müəyyən edilmiş qaydalar pozulmaqla alınıb-satılması və ya dəyişdirilməsi faktları aşkar edilib. Keçirilən tədbirlər zamanı vergi orqanlarında uçota durmadan fəaliyyət göstərən 197 vergi ödəyicisi aşkar edilib, 184 vergi ödəyicisinin xüsusi razılıq (lisenziya) tələb olunan fəaliyyət növləri ilə razılıq (lisenziya) olmadan məşgul olması faktları müəyyən edilib.
Vergi orqanlarının həyata keçirdiyi operativ nəzarət tədbirləri zamanı 38 vergi ödəyicisində 47 nəfər fiziki şəxsin əmək müqaviləsi bağlamadan işə cəlb edilməsi, 179 vergi ödəyicisinin fərqlənmə nişanı olmadan avtomobil nəqliyyatı ilə sərnişin daşıması faktları aşkar olunub.
Aksiz markalarının tətbiqi vəziyyətinə nəzarət məqsədilə keçirilən tədbirlər zamanı isə 19 vergi ödəyicisində 968.3 manat dəyərində 704 ədəd aksiz markaları ilə müvafiq qaydada markalanmamış mallar aşkar edilib.
Noyabrın 10-na olan rəsmi məzənnə 0,8029 AZN/USD təşkil edir.
Məqalə müəllifi ilə əlaqə ünvanı: [email protected]
