Azərbaycan, Bakı, 10 noyabr / Trend , müxbir Ü.İsmayılova/
Bakıda çərşənbə axşamı Azərbaycan və Rusiya arasında əməkdaşlıq üzrə işçi qrupunun növbəti iclası keçirilib. Bu barədə Əmək və Əhalinin Sosial Müdafiəsi Nazirliyi tərəfindən çərşənbə axşamı yayılan məlumatda deyilir.
"Hazırda Azərbaycanda 250 Rusiya şirkəti, 360 birgə müəssisə fəaliyyət göstərir", - iclasda Azərbaycan tərəfindən olan həmsədr, əmək nazirinin müavini Natiq Məmmədov deyib.
Nazir müavini deyib ki, ölkələr arasında yaradılan dostluq əlaqələri və strateji əməkdaşlıq Azərbaycanda fəaliyyət göstərən şirkət və şəxslərin gələcəkdə də sayının artacağını söyləməyə əsas verir. Bununla əlaqədar olaraq, hər iki ölkənin miqrantlarının əmək hüquqlarının müdafiəsini və sosial müdafiəsini təmin etmək, həmçinin əmək fəaliyyəti üçün normal şərait yaratmaq lazımdır.
Rusiyanın Miqrasiya Xidməti rəhbərinin müavini Sergey Boldırev iclas zamanı bildirib ki, Rusiya miqrasiya sahəsində əməkdaşlığın möhkəmlənməsində maraqlıdır və bunun üçün müvafiq səylər göstərəcək.
"İclas zamanı işçi qrupu tərəfindən Azərbaycan və Rusiya arasında əmək miqrasiyası sahəsində əməkdaşlığa dair hökumətlərarası razılaşma layihəsi də müzakirə edilib. İclasın yekunlarına dair protokol çərşənbə günü imzalanacaq", - məlumatda deyilir.
