Azərbaycan, Bakı, 12 noyabr / Trend /
2009-cu il noyabrın 1-nə Azərbaycan bankı Bank Respublikanın aktivləri 363,7 milyon manata çatıb, hesabat dövrünə bankın kredit portfeli üzrə qalıq 226,95 mln. manat təşkil edib.
İlin əvvəlindən Bank Respublikanın müştəri hesablarında olan vəsaitlər 17,9% artaraq 160,1 mln. manatı keçib. 2009-cu ilin yanvar-oktyabr ayları ərzində Bank Respublikada yerləşdirilən fiziki şəxslərin əmanətləri 40,9% artaraq 111,9 mln. manata çatıb. Bununla yanaşı, hesabat dövründə əhalinin əmanətləri 2009-cu ilin 1 yanvar tarixinə olan 64,2 mln. manatla müqayisədə 49% artaraq 95,6 mln. manat təşkil edib.
2009-cu ilin yanvar-oktyabr ayları ərzində Bank Respublikanın gəlirləri 47,3 mln. manat, xərcləri isə 38,6 mln. manat təşkil edib. Hesabat dövründə bankın balans mənfəəti 8,7 mln. manat təşkil edir.
2009-cu il oktyabrın əvvəlində Bank Respublika ilə Beynəlxalq Maliyyə Korporasiyası (IFC) arasında Bank Respublikaya 5 il müddətinə 20 mln. ABŞ dolları məbləğində kredit xəttinin açılmasına dair saziş bağlanılıb. Kredit xətti ölkədə kiçik və orta sahibkarlığın maliyyələşdirilməsi (SME Lending) proqramı üzrə ayrılıb.
Bank Respublika 1992-ci ildən fəaliyyətə başlayıb. Bankın səhmdarları sırasında səhmdar kapitalının "25% + 1 səhm" paketinə sahib olan Almaniyanın 2 nəhəng maliyyə təşkilatı - KfW bank qrupunun üzvü DEG İnvestisiya Şirkəti və Sparkassen-Finanzgruppe maliyyə qrupunun üzvü Sparkassen International Development Trust təmsil olunur. 1 noyabr 2009-cu il tarixinə Bank Respublikanın məcmu kapitalı 56,3 mln. manat, nizamnamə kapitalı isə 22,6 mln. manatdır. Hazırda Bakı və regionlarda Bank Respublikanın 34 filial və şöbəsi fəaliyyətdədir.
