Azərbaycan, bakı, 18 yanvar/ Trend , müxbir Ü.İsmayılova/
Azərbaycanın ən iri sığorta şirkətlərindən biri olan "Paşa Sığorta" nizamnamə kapitalını 11 milyon manatadək artırmağı planlaşdırır. Bu barədə bazar ertəsi şirkətin İdarə Heyətinin sədri Nofəl Rzayev bildirib.
"İlkin mərhələdə şirkətin nizamnamə kapitalı minimum iki milyon manat artırılaraq 9 milyon manatdan 11 milyon manata çatdırılacaq", - Rzayev deyib.
Onun sözlərinə görə, nizamnamə kapitalının iki milyonluq artımı 2009-cu ilin yekunları üzrə gözlənilən gəlirin hesabına təmin ediləcək. Gəlirlər tamamilə şirkətin kapitallaşmasına yönəldiləcək.
Fevral ayının əvvəllərində, Rzayevin sözlərinə görə, şirkət səhmdarlarının 2009-cu ilin fəaliyyət yekunlarının müzakirəsinə həsr edilən növbəti iclasının keçirilməsi gözlənilir. Bu iclasda nizamnamə kapitalının təkcə gəlirlərin hesabına deyil, eləcə də əlavə olaraq səhmdarların vəsaitləri hesabına artırılmasına dair qərarın qəbul ediləcəyi gözlənilir.
Azərbaycanın Maliyyə Nazirliyinin sığorta şirkətlərinin nizamnamə kapitalına olan minimal tələbi 2010-cu il yanvarın 1-nə 2 milyon manat təşkil edir.
İlkin məlumatlara görə, 2009-cu ilin yekunları üzrə şirkətin sığorta haqlarının həcmi 10,4 milyon manat təşkil edib. Şirkətin ödəmələri isə hələlik dəqiqləşdirilir. Şirkətin 2008-ci ilin yekunları üzrə sığorta haqları 0,94 milyon manatlıq ödəmələrlə 8,44 milyon manat təşkil edib.
"Paşa Holdinq" Şirkətlər Qrupuna daxil olan "Paşa Sığorta" Bakıdakı mərkəzi ofis, Sumqayıt və Xırdalanda yerləşən şervis şöbələri vasitəsilə korporativ və fərdi müştərilərə sığortanın 30 növü üzrə xidmət göstərir. Kapitallaşma göstəriciləri üzrə şirkət 9 milyon manatlıq nizamnamə kapitalı və cari 11,5 milyton manatlıq məcmu kapitalı ilə ölkənin 10 aparıcı sığortaçılarının siyahısına daxil olub.
Yanvarın 18-nə olan rəsmi məzənnə 0,8030 AZN/USD təşkil edir.