Azərbaycan, Bakı, 26 yanvar / Trend , müxbir N.İsmayılova/
Azərbaycan hökuməti və Dünya Bankı iyun ayında ölkə iqtisadiyyatının diversifikasiyalaşdırılması çərçivəsində uzunmüddətli inkişaf strategiyasının hazırlanmasını başa çatdıracaq. Bunu İqtisadi Siyasət və Proqnozlaşdırma Departamentinin direktoru Ədalət Muradov "Keçid iqtisadiyyatı haqqında" məruzənin (Transition report 2010) təqdimatında deyib.
"Strategiya ölkədə iqtisadiyyatın qeyri-neft sektorunun inkişafı məqsədi ilə hazırlanır, lakin yeni strategiyanın məhz hansı sahələri əhatə edəcəyini demək çətindir. Kənd təsərrüfatı, turizm, qeyri-neft sənayesi, nəqliyyat hökumətin mühüm hesab etdiyi sahələrdəndir", - Muradov deyib.
Onun sözlərinə görə, ölkədə adambaşına düşən qeyri-neft ixracı 100 dollar təşkil edir ki, bu da ölkənin böyük potensialının olduğunu göstərir. ÜDM-də neft ixracının payı 2008-ci ildən etibarən 58%-dən 49%-dək azalıb.
"Qeyri-neft sektoru növbəti 25 il ərzində 30-50 dəfə artmalıdır", - o deyib.
