Azərbaycan, Bakı, 25 fevral / Trend , Ü.İsmayılova/
Dövlət Sığorta Nəzarəti Xidməti və Azərbaycan Sığortaçılar Assosiasiyası azərbaycanlı sığortaçıların Kiyevə səfərini təşkil edib. Səfərdə məqsəd ukraynalı həmkarların təcrübəsinin öyrənilməsidir. Bu barədə cümə axşamı assosiasiyanın icraçı direktoru Qafar Məcidov məlumat verib.
"Ukraynalı həmkarları ilə görüş çərçivəsində azərbaycanlı sığortaçılar mümkün əməkdaşlığın inkişafı üçün işgüzar görüşlər də təşkil edəcəklər", - deyə Məcidov vurğulayıb.
Onun sözlərinə görə, səfər çərçivəsində azərbaycanlı sığortaçılardan ibarət qrup Ukraynanın sığorta nəzarəti orqanı və ölkənin Sığortaçılar Assosiasiyasında görüşlər keçirəcəklər.
"Azərbaycan və Ukrayna sığortaçıları arasında müzakirələrin əsas mövzusu OSAQO sığortası olacaq", - deyə Məcidov bildirib.
Azərbaycanlı sığortaçıların Kiyevə səfəri martın 3-5-də olacaq.
Azərbaycanda 28 sığorta və bir təkrar sığorta şirkəti fəaliyyət göstərir. Yanvarda fəaliyyətin yekunlarına görə, şirkətlərin ümumi tədiyəsi 18,92 milyon manat, ödənişləri 2,84 milyon manat təşkil edib.
