Azərbaycan, Bakı, 13 mart / Trend , N.İsmayılova/
Dünya Bankının missiyası martın 16-dan 20-dək Bakıda olacaq. Missiyaya nəqliyyat üzrə baş mütəxəssis və layihə qrupunun rəhbəri Cerald Olivye rəhbərlik edəcək. Missiyada məqsəd Azərbaycanın dəmir yolu və ticarəti üzrə tranzitə yardım layihəsinin icmalının aparılmasıdır. Bu barədə bankın Bakı nümayəndəliyindən məlumat verilib.
Missiyanın əsas məqsədi layihənin reallaşmasına hazırlıq üzrə işlərin həyata keçirilməsidir. Ölkə hökuməti və DB arasında kredit sazişi 2009-cu ilin dekabrında imzalanıb.
Dəmir yolu və ticarətin tranzitinə dəstək layihəsinin ümumi dəyəri 673,8 milyon dollar təşkil edir. Bunun 450 milyon dolları DB-nin payına düşür. Layihə Azərbaycanda dəmir yolu infrastrukturunun (2008-2013-cü illər) təkmilləşdirilməsi üzrə Dövlət Proqramı layihəsinin bir hissəsidir. Layihənin ümumi dəyəri 1,2 milyard manat təşkil edir.
Kredit vəsaitləri Avropa Yenidənqurma və İnkişaf Bankının xətti ilə, səkkiz il güzəşt dövrü daxil olmaqla, 23 il müddətinə, altıaylıq libor üstəgəl dəyişən spred tarifi üzrə verilir. Kredit üzrə komissiya 0,25 faiz müəyyən olunub. Kredit üzrə ödəniş ildə iki dəfə - 15 iyun və 15 dekabrda həyata keçiriləcək.
Kredit çərçivəsində Bakı-Böyük Kəsik məntəqəsində dəmiryol xəttinin yenidən qurulması planlaşdırılır, birinci mərhələdə isə uzunluğu 300 kilometrdən artıq, təxirəsalınmaz təmirə ehtiyacı olan dəmiryol məntəqəsinin təmir işləri yerinə yetiriləcək.
Ümumiyyətlə, layihə çərçivəsində 503 kilometr dəmir yolunun əsaslı təmir edilməsi nəzərdə tutulur, investisiya, həmçinin, Bakı - Böyük Kəsik istiqamətində daimi cərəyandan fasiləli rejimə keçməyə, fasiləli cərəyan üzrə işlər üçün 50 yeni lokomotivin əldə edilməsinə yönəldiləcək. Layihə dəmiryol ilə sərnişindaşımanın sürətini 100 km/s, yükdaşımanın sürətini isə 80 km/s-yə çatdırmağı nəzərdə tutur.
Layihə dəmiryol üzrə xidmətlərin təkmilləşdirilməsi, rəqabət qabiliyyətinin təmin edilməsi, əməliyyat və iqtisadi effektivliyi, "Azərbaycan Dəmir Yolları" QSC-nin və şərq-qərb istiqamətində dəmiryol xətlərinin maliyyə imkanlarının genişləndirilməsini nəzərdə tutan üç komponentdən ibarətdir.
Birinci komponent dəmiryol təsərrüfatını, xüsusilə də Bakıdan Gürcüstan sərhədinə qədər olan məntəqələrin reabilitasiyasını, 3,3 kv daimi cərəyandan 25 kv fasiləli cərəyana keçid, elektrik təchizatı sisteminə keçid ilə əlaqədar olaraq siqnal sistemlərinin dəyişdirilməsini nəzərdə tutur.
İkinci komponent çərçivəsində elektrik lokomotivlərinin əldə olunması, üçüncü komponentdə isə "Azərbaycan Dəmir Yolları" QSC-nin fəaliyyətinin müasirləşdirilməsi və iqtisadi bazar tələblərinə yaxınlaşdırılması nəzərdə tutulur.
