Azərbaycan, Bakı, 15 mart / Trend , müxbir T.Cəfərov/
İranda "Şimal-Cənub" beynəlxalq nəqliyyat dəhlizi çərçivəsində yeni Qəzvin-Rəşt avtomagistralı istismara verilib. Bu barədə İran telekanalının rəsmi saytı "iribnews"da yerləşdirilən məlumatda deyilir. Magistralın açılış mərasimində İran Prezidenti Mahmud Əhmədinejad iştirak edib.
Qəzvin-Rəşt avtomagistralı İranın Gilan və Ərdəbil şəhərlərini paytaxtla birləşdirir.
"Bazar ertəsi 138 kilometrlik Qəzvin-Rəşt yolunun 127 kilometrinin açılış mərasimi keçirilib", - məlumatda deyilir. Bu layihənin reallaşdırılmasına 400 milyon dollar investisiya yatırılıb. Magistralda ümumi uzunluğu 5500 metr olan 10 tunel və 30 körpü var.
Hazırda magistralın qalan 11 kilometrinin tikintisi üçün podratçıların seçimi aparılır. Yolun ötürücülük qabiliyyəti sutkada 53,2 min minik avtomobilidir.
Tehran-Qəzvin-Rəşt-Ənzəli magistralı "Şimal-Cənub" beynəlxalq nəqliyyat dəhlizinin tərkib hissəsidir.
