Azərbaycan, Bakı, 12 aprel /Trend, müxbir N.İsmayılova/
Azərbaycan Mərkəzi Bankı (AMB) ölkənin bank sektorunun konsolidasiyası prosesində maraqlıdır. Bunu bazar ertəsi AMB-nin Kredit təşkilatlarının fəaliyyətinə nəzarət departamentinin rəhbəri Rəşad Orucov deyib.
"Konsolidasiya bank sektorunda uzunmüddətli prosesdir. 1994-1995-ci illərdə ölkənin bank sektoru 250 bankı əhatə edib, hazırda isə 47 bank qalıb. Onların sayının azalması konsolidasiya prosesidir ki, bu da kifayət qədər sakit və uzun müddət davam edib", - Orucov bildirib.
Onun sözlərinə görə, AMB birləşmə prosesində banklar üçün müvəqqəti çərçivə qoymur.
"Mərkəzi Bank olaraq biz, bankların birləşməsində, möhkəmlənməsində, öz kapitallarını artırmasında maraqlıyıq. Çünki iri layihələrin maliyyələşdirilməsinə ehtiyac var və bundan ötrü bazarda iri oyunçular lazımdır", - o deyib.
Onun fikrincə, bunun üçün stimul dəstək ola bilər ki, beynəlxalq maliyyə təşkilatları da konsolidasiya olunmuş banklara bu dəstəyi göstərməyə hazırdır.
2010-cu il martın 1-nə olan məlumata görə, ölkənin bank sektorunun ümumi aktivləri 11,57 milyard manat təşkil edib ki, bu da fevralın əvvəllərinə olan göstəricidən 0,2 faiz az, ilin əvvəlinə olan göstəricidən isə 4,8 faiz çoxdur. Bankların investisiya qoyuluşları fevralda 0,2 faiz artaraq 853,31 milyon manat təşkil edib, müştərilərə verilən kreditlər 7873,4 milyon manat (azalma 1,2 faiz) təşkil edib. Ölkənin maliyyə sektoruna verilən kreditlərin və depozitlərin həcmi 0,3 faiz azalaraq 532,06 milyon manat təşkil edib.
2010-cu il martın 1-də Azərbaycan banklarının ümumi öhdəlikləri 0,3 faiz azalaraq 9,57 milyard manat təşkil edib. Bunun 4208,94 milyon manatı depozitlərin, 4576,9 milyon manatı maliyyə bazarından alınan kreditlərin və depozitlərin payına düşüb.
Aprelin 12-nə olan rəsmi məzənnə 0,8035 AZN/USD təşkil edir.
