Azərbaycan, Bakı, 21 aprel /Trend/
Azərbaycan Nəqliyyat Nazirliyi aprelin 22-23-də Cenevrədə BMT Avropa İqtisadi Komissiyasının (AİK) avtomobil nəqliyyatı üzrə işçi qrupunun fövqəladə toplantısında iştirak edəcək. Bu barədə Nəqliyyat Nazirliyinin çərşənbə günü yaydığı məlumatda bildirilir.
Toplantıda Nəqliyyat Nazirliyinin nəqliyyatda əlaqələndirmə və lisenziyalaşdırma şöbəsinin nəqliyyatda əlaqələndirmə sektorunun müdiri Eldar Əlizadə və nəqliyyatın inkişafı, elmi texniki siyasət şöbəsinin informatika və məlumat sektorunun müdiri İsmayıl Kərimov iştirak edəcəklər.
Azərbaycan 1996-cı il mayın 31-də "Beynəlxalq avtomobil daşımalarını həyata keçirən nəqliyyat vasitələri heyətinin işinə dair Avropa Sazişi"nə qoşulub. Sazişin tələblərinin həyata keçirilməsində əsas məqsəd beynəlxalq avtomobil daşımalarında təhlükəsizlik məsələlərinin təmin edilməsidir. Beynəlxalq daşımalarda iştirak edən nəqliyyat vasitələri sürücülərinin iş və istirahət rejiminə daha effektiv nəzarətin təşkili məqsədilə BMT AİK-in müvafiq qərarına əsasən, sazişə 5-ci düzəliş edilib və 2006-cı il 16 iyun tarixindən sazişə üzv Avropa İttifaqı dövlətlərində rəqəmsal taxoqraf sisteminin tətbiqinə başlanılıb.
Azərbaycan ərazisində rəqəmsal taxoqraf sisteminin tətbiqi ölkəyə daxil olan 50 000-dən artıq xarici və 1 000-dən artıq milli daşıyıcının iş və istirahət rejiminə nəzarətin təşkilini nəzərdə tutur.