Azərbaycan, Bakı, 5 may /Trend, müxbir Ü.İsmayılova/
Azərbaycan Auditorlar Palatası 2010-cu ilin ikinci yarısından auditorlar tərəfindən beynəlxalq audit standartlarına əməl olunması üzərində nəzarətə başlayacaq. Həmin standartlar 2010-cu il yanvarın 1-dən Azərbaycanda tətbiq edilir. Bu barədə palatanın rəhbəri Vahid Novruzov çərşənbə günü məlumat verib.
Onun sözlərinə görə, Auditorlar Palatası bəzi auditorların beynəlxalq standartlara keçid zamanı problemlərlə üzləşəcəklərini istisna etmir və bu prosesdə palata hər cür kömək göstərməyə hazırdır.
"Göstərilən xidmətlərin keyfiyyəti üzərində nəzarət də beynəlxalq standartlara müvafiq həyata keçiriləcək. Lakin bu istisqamətdə bir sıra problemlərin olduğu da istisna edilmir. Palata ümid edir ki, aparıcı auditor şirkətlərinin, eləcə də bu sahədəki mütəxəssislərin dəstəyi ilə nəzarət zəruri səviyyədə həyata keçiriləcək", - Novruzov deyib.
Azərbaycanda 2010-cu il yanvarın 1-dən beynəlxalq audit standartları tətbiq edilir.
Azərbaycanda beynəlxalq audit standartlarının tətbiqi dörd mərhələdə həyata keçirilir: birincisi, hüquqi, ikincisi, normativ bazanın təkmilləşdirilməsi, üçüncüsü, kadrların hazırlanması və dördüncüsü, beynəlxalq standartlara uyğun keyfiyyətə nəzarət.
Dünya Bankı Azərbaycan Auditorlar Palatasına korporativ və dövlət sektorunda mühasibatın təkmilləşdirilməsi layihəsi (CAP/SAP) çərçivəsində ümumi məbləği 24 milyon dollar olan texniki yardım göstərir. Kredit sazişi 2008-ci ilin sentyabrında imzalanıb.
Layihə DB-nin 11 milyon dollar həcmində krediti, Yaponiyanın PHRD fondunun qrantı (3 milyon dollar), İqtisadi məsələlər üzrə İsveçrə Dövlət Katibliyi (SECO) (2 milyon dollar) və Azərbaycan hökumətinin payı (səkkiz milyon dollar) hesabına maliyyələşdirilir.
Azərbaycan artıq kommersiya sektoru üçün 28 milli standart hazırlayıb. Dünyada maliyyə hesabatlılığı və auditin 35 standartı mövcuddur. Ölkədə IFRS-ə keçid dövlət sektoru üçün 2008-ci il yanvarın 1-dən başlayıb.
Azərbaycan Auditorlar Palatası 1995-ci ilin sentyabrında təsis olunub və 1996-cı ilin aprelindən aktiv fəaliyyətə başlayıb. Azərbaycanda "Auditor fəaliyyəti haqqında" qanun 1994-cü ildə qəbul edilib.