Azərbaycan, Bakı, 10 may /Trend, müxbir N.İsmayılova/
VTB Bank (Azərbaycan) ölkənin ipoteka bazarında yalnız məhdudlaşdırılmış həcmdə iştirak etməyi planlaşdırır. Bu barədə bankın idarə heyətinin sədri Oleq Krasnojon bildirib.
"Biz ipoteka kreditləşməsi ilə məşğul ola bilərik, lakin bu bizim üçün prioritet olmayan fəaliyyət növüdür. İpoteka kreditləşməsi üçün uzunmüddətli və ucuz maliyyə resursları lazımdır, biz haradasa beş il müddətinə yüngül resurslar cəlb edə bilərik, ipoteka proqramında geniş iştirak üçün isə ən azı 10-15 illik sabit resurslar gərəkdir. Ona görə də biz çox tələsmirik, lakin məhdudlaşdırılmış həcmdə ipoteka proqramında iştirak edəcəyik", - Krasnojon deyib.
Bank, həmçinin müvəkkil bankların siyahısına qoşulmaq üçün Mərkəzi Bank yanında fəaliyyət göstərən Azərbaycan İpoteka Fonduna müraciət edib.
2010-cu ildə VTB Bank (Azərbaycan) əsas etibarilə orta biznesin korporativ müştəriləri ilə iri layihələri maliyyələşdirmək istiqamətində işləmək niyyətindədir. Bank onların maliyyələşdirilməsinə başlamaq üçün kifayət həcmdə vəsaitə malikdir.
Krasnojonun sözlərinə görə, bu günə bankın nizamnamə kapitalı 24 milyon manat təşkil edir və bank bu il onu 20 milyon manatadək artırmağı planlaşdırır.
"VTB-Azərbaycan" ASC-yə bank lisenziyasını Azərbaycan Mərkəzi Bankı 2009-cu il martın 11-də verib.
VTB-nin əsas səhmdarı 85,5 faiz hissəyə malik olan RF hökumətidir. Bankın nizamnamə kapitalında digər səhmdarların hissələri 14,4 faiz, o cümlədən qlobal depozitar qəbzlərin sahiblərinin hissələri isə 7,01 faiz təşkil edir.
Mayın 10-na olan rəsmi məzənnə 0,8035 AZN/USD təşkil edir.