Azərbaycan, Bakı, 8 iyun /Trend, müxbir Ü.İsmayılova/
Azərbaycanda nikah müqavilələrinin bağlanması məcburi xarakter daşımayacaq. Bu barədə Azərbaycan Səhiyyə Nazirliyinin tibbi yardımın təşkili şöbəsinin rəhbəri Elmira Əliyeva bildirib.
"Azərbaycan Səhiyyə Nazirliyi Azərbaycan Ailə Məcəlləsinə əlavələr işləyib hazırlayıb. Həmin əlavələrə görə, nikah müqavilələrinin bağlanması yalnız tövsiyə xarakteri daşıyacaq", - Əliyeva deyib.
Azərbaycan insan haqları üzrə Avropa Konvensiyasının iştirakçısıdır. "Həmin Konvensiyaya görə, nazirlik kimisə müvafiq laboratoriya analizlərindən keçməyə məcbur etmək hüququna malik deyil", - Əliyeva qeyd edib.
Onun sözlərinə görə, Azərbaycanda erkən nikahlar geniş yayılıb və nəticədə müəyyən xəstəlikləri olan uşaqlar dünyaya gəlir. Tibbi müayinədən keçməyin əsas məqsədi gələcək körpənin sağlamlığına təsir edə biləcək mümkün xəstəliyin vaxtında aşkar olunmasıdır.
"Gənclər arasında mümkün xəstəliklərdən vaxtında müalicə gələcəkdə Azərbaycanın sağlam genofondunun olmasına zəmanət verir", - Əliyeva bildirib.
Nikah müqaviləsi nikaha daxil olan şəxslər arasında bağlanan, nikah dövründə və ya nikah pozulduqda ər-arvadın əmlak hüquqlarını və vəzifələrini müəyyən edən sazişdir. Nikah müqaviləsi yazılı formada bağlanır və notariat qaydasında təsdiq olunur.
Nikah müqaviləsində tərəflərin bir-birini qarşılıqlı saxlaması, bir-birinin gəlirlərində iştirak üsulları, bir-birinin ailə xərclərində iştirak qaydası ilə bağlı hüquq və vəzifələri, nikah pozulduqda hər birinə düşəcək əmlakı müəyyənləşdirmək hüququ müəyyən edilir.
Nikah müqaviləsi ər-arvadın mövcud olan və gələcəkdə əldə edəcəkləri əmlaka dair bağlana bilər.
Nikah müqaviləsi nikaha qədər və nikahdan sonra da bağlana bilər. Müqavilə nikaha qədər bağlansa da, bu nikah qeydə alındığı gündən qüvvəyə minir. Müqavilədə əmlakın hüquqi rejimi müəyyən olunur.