Azərbaycan, Bakı, 11 iyun /Trend, müxbir N.İsmayılova/
Beynəlxalq Maliyyə Korporasiyası (BMK) Azərbaycanın İqtisadi İnkişaf Nazirliyi yanında işçi qrupunun hazırladığı korporativ idarəetmə standartlarını özəl şirkətlər və beynəlxalq ekspertlərlə razılaşdırır. Bu barədə cümə günü BMK-nın korporativ idarəetmə layihəsinin rəhbəri Karolina Brayt bildirib.
"Biz özəl sektordan şərhlər toplayırıq, bununla əlaqədar artıq fokus-qrup yaradılıb. Biz artıq Quba, Lənkəran və Gəncədə özəl sektorun nümayəndələri ilə müzakirələr aparmışıq. Bakıda da müzakirələrin aparılması planlaşdırılır", - Brayt deyib.
Onun sözlərinə görə, razılaşdırma özəl sektorun nümayəndələrinə öz fikir və tövsiyələrini təqdim etmək imkanının verilməsi məqsədilə həyata keçirilir. BMK həmçinin standartları beynəlxalq ekspertlərlə də razılaşdırır və bu tövsiyələr nəzərə alınmaqla standartlara dəyişikliklər ediləcək.
"Biz yayın sonunadək ilkin variantın təqdim olunacağını gözləyirik, payız və qışa yaxın isə standartların yekun variantı təqdim olunacaq", - Brayt deyib.
İşlənib hazırlanan məcəllə aşağıdakı prinsiplərə əsaslanır: bütün səhmdarlara bərabər münasibət; direktorlar şurasının və menecmentin hesabat verməli olması; informasiyaların açılması və şəffaflıq, daha doğrusu, maliyyə və digər hesabatların vaxtında və tam təqdim edilməsi; minoritar səhmdarların və digər qrupların maraqlarına əməl olunmasına görə məsuliyyət, eləcə də qanuna hökmən əməl olunması.
Korporativ idarəetmə standartlarının işlənməsi üçün yaradılan işçi qrupuna İqtisadi İnkişaf, Ədliyyə nazirliklərinin, Mərkəzi Bankın, QKDK, Azərbaycan İnvestisiya Şirkətinin və BMK-nin nümayəndələri də daxildir.
