Аzərbaycan, Bakı, 17 iyun /Trend, müxbir Ü.İsmayılova/
Azərbaycan Qiymətləndiricilər Cəmiyyəti Beynəlxalq Maliyyə Korporasiyası (IFC) və Dövlət İqtisad Universiteti ilə birlikdə "Müqayisəli üsulla daşınmaz əmlak obyektlərinin qiymətləndirmə metodologiyası" üzrə birgə kurs keçirəcək. Bu barədə cümə axşamı Azərbaycan Qiymətləndiricilər Cəmiyyətindən məlumat veriblər.
"Kursların keçirilməsində əsas məqsəd daşınmaz əmlakın qiymətləndirilməsi sahəsində nəzəri və təcrübi biliklərin əldə edilməsi, həmçinin qiymətləndiricilərin peşəkar səviyyəsinin artırılmasıdır", - cəmiyyətdən bildiriblər.
Təcrübi məşğələlər Azərbaycan Dövlət İqtisad Universitetinin təcrübəli mühazirəçiləri tərəfindən keçiriləcək.
Kurslar iyunun 21-dən 25-dək keçiriləcək.
Azərbaycanda qiymətləndirmə fəaliyyətinin keyfiyyətinin artırılması ilə bağlı işlər Azərbaycan və Orta Asiyada ipoteka kreditlərinin verilməsinin inkişafı üzrə IFC proqramı çərçivəsində həyata keçirilir.
Azərbaycan Qiymətləndiricilər Cəmiyyəti 1997-ci ildə qeydiyyatdan keçib. Bu, Azərbaycan ərazisində fəaliyyət göstərən bütün qiymətləndiriciləri birləşdirən ictimai təşkilatdır. Azərbaycanda qiymətləndirmə fəaliyyəti 1995-ci ildə qəbul olunmuş "Qiymətləndirmə fəaliyyəti haqqında" qanunla tənzimlənir.
