Azərbaycan, Bakı, 21 iyun /Trend, müxbir Ü.İsmayılova/
Azərbaycanda təbii fəlakət nəticəsində kənd təsərrüfatı məhsullarının qiymətində artım baş verməyib. Bu barədə bazar ertəsi Azərbaycanın kənd təsərrüfatı naziri İsmət Abasov deyib.
"Hazırda kənd təsərrüfatı məhsullarının qiyməti hətta ötənilkinə nisbətən aşağıdır", - nazir qeyd edərək konkret rəqəmi göstərməyib.
Onun sözlərinə görə, leysan yağışların yağması və əkin sahələrini su basması nəticəsində kənd təsərrüfatı məhsullarının çatışmazlığı da müşahidə edilmir.
Mayın əvvəlindən yağan intensiv yağışlar nəticəsində, Kürün məcradan çıxması və digər çaylarda daşqınlar səbəbindən 40 rayonun ərazisində subasma halları qeydə alınıb. Bu təbii fəlakət nəticəsində 20 minə yxın ev su altında qalıb, 300-dən çox ev dağılıb, 2 min ev qəzalı vəziyyətdədir və 60 min hektar əkin və örüş sahələrini su basıb.
