Аzərbaycan, Bakı, 30 iyun /Trend, müxbir N.İsmayılova/
"Pasha Bank" yaxın günlərdə "FundSys" modulunu tətbiq etmək niyyətindədir, - bu barədə çərşənbə günü bankın idarə heyətinin üzvü və əməliyyat departamentinin direktoru Emil Hacıyev 2009-cu ildə bankın fəaliyyətinin yekunlarına həsr olunmuş mətbuat konfransında deyib.
"Bununla biz müştərilərə göstərilən xidmətlərin keyfiyyətini yaxşılaşdırmağa və bankın məhsul spektri və xidmətini genişləndirməyə çalışırıq", - Hacıyev deyib.
Onun sözlərinə görə, bir il yarım ərzində bank tərəfindən aktivlərin idarəetmə, mühasibat uçotu, internet-bankinq modulu istifadəyə verilib. Həmçinin, bank tərəfindən CAP modulu tətbiq edilib.
Bankın xidmətlərindən regional miqyasda istifadə olunmasını asanlaşdırmaq məqsədilə, "Pasha Bank" inkişaf strategiyasına əsasən, Azərbaycanın əsas regionlarında - Gəncə - Qazax, Zaqatala, Quba - Xaçmaz və Masallı - Lənkəran filialların açılmasını nəzərdə tutur.
Hal-hazırda "Pasha Bank"ın mərkəzi ofisi, həmçinin, "Bridge Plaza" və "Shuvelan Park" ticarət mərkəzlərində bölmələri vardır. Bundan başqa, ilin sonunadək Bakıda "Port Baku" ticarət mərkəzində filialın açılması planlaşdırılır.
"Pasha Bank" ASC 2007-ci ilin iyun ayında təşkil edilmiş və Azərbaycan Respublikası Mərkəzi Bankının 250 saylı 28 noyabr 2007-ci il tarixli lisenziyası əsasında fəaliyyət göstərir. Nizamnamə kapitalının həcminə görə - 115 407 100 manat - Azərbaycanda ikinci yeri tutur.
"Pasha Bank"ın strateji vəzifəsi korporativ sektora xidmət etməkdir. Bankın əsas məqsədi - strategiyadan irəli gələn prioritet istiqamətlər üzrə biznesin keyfiyyətli inkişafı, eləcə də müştərilər və əməkdaşlarımızla uzunmüddətli və etibarlı münasibətlər yaratmaq və inkişaf etdirməkdir.
