Azərbaycan, Bakı, 30 iyun /Trend, müxbir İ.Xəlilova/
Azərbaycan hökuməti iyulda ölkənin Ümumdünya Ticarət Təşkilatına (ÜTT) daxil olması çərçivəsində xidmətlər üzrə ikitərəfli danışıqlara hazırlaşır. Bu barədə çərşənbə günü danışıqlar qrupunun rəhbəri, Azərbaycan xarici işlər nazirinin müavini Mahmud Məmmədquliyev bildirib.
"Xidmətlər üzrə danışıqlar Azərbaycan tərəfinin təklifi əsasında Avropa İttifaqı, Hindistan və digər ölkələrlə aparılacaq. Mallar üzrə danışıqların aparılması isə ÜTT Katibliyinə təkliflər təqdim edildikdən sonra mümkün olacaq ki, bu da yaxın vaxtlarda gözlənilir", - nazir müavini qeyd edib.
Aİ və ABŞ ilə ikitərəfli danışıqlar prosesində tarif öhdəlikləri də əsasdır. Tarif siyasəti ilə yanaşı, onların tələbləri əqli mülkiyyət məsələləri üzrə xidmətlər sahəsinin liberallaşdırılmasına da aiddir. Onlar maliyyə, kommunikasiya sektorlarında distribüter servisi, paylayıcı sahələrdə isə bazarların açılmasını təklif edirlər.
İkitərəfli danışıqlar ümumilikdə 10 ölkə ilə aparıla bilər. Bu ÜTT-yə üzv ölkələr tərəfindən göstərilən maraqdan asılı olacaq.
Hazırda Azərbaycan ABŞ, Yaponiya, Braziliya, Ekvador, Şri-Lanka, Avropa İttifaqı, Norveç, Hindistan, Cənubi Koreya, Çinin Tayvan vilayəti ilə danışıqlar prosesindədir. 2009-cu ildə bu siyahıya İsveçrə də qoşulub.
ÜTT-yə daxil olmağa hazırlıq üzrə hökumət komissiyası ABŞ, Aİ, Yaponiya və Cənubi Koreya üçün xidmətlər sahəsində təkliflər hazırlayıb.
Azərbaycana baum-tarifləri azaltmağı təklif edən ölkələrin siyahısı genişlənir. Buna görə də danışıqlar aparılan hər hansı ölkə ilə danışıqların başa çatdırılmasından söz açmaq hələ ki tezdir.
Bu günədək Azərbaycan Türkiyə, Oman Sultanlığı, Birləşmiş Ərəb Əmirlikləri və Gürcüstanla danışıqları başa çatdırıb və protokollar imzalanıb. Ölkə hələ sənədləri nəzərdən keçirən Moldova ilə protokolun imzalanması mərhələsindədir, Qırğızıstan və Gürcüstan isə imzalanmaya razılıq verib.
Bu yaxınlarda ÜTT Katibliyi Azərbaycan üzrə işçi qrupunun tərkibini genişləndirib və ora daha 4 ölkə - Ukrayna, Braziliya, Ekvador və İsveçrəni əlavə edib. Nəticədə işçi qrupunun üzvlərinin sayı Aİ-nin 27 ölkəsi də daxil olmaqla 32-yə çatıb.
ÜTT Katibliyi yanında Azərbaycan üzrə işçi qrupu 1997-ci il iyulun 16-da yaradılıb.
Azərbaycan 1997-ci ildən Ümumdünya Ticarət Təşkilatında müşahidəçi statusunda təmsil olunur.
