Azərbaycan, Bakı, 5 iyul /Trend, müxbir N.İsmayılova/
2010-cu ilin yanvar-may aylarında Azərbaycanın dövlət büdcəsinin mədaxil hissəsinə faktiki daxilolmalar 4096,2 milyon manat (ÜDM-in 24,8 faizi) təşkil edib ki, bu da ötən ilin müvafiq dövr göstəricisindən 1,82 faiz çoxdur. Bu barədə bazar ertəsi hökumətdən bildirilib.
Dövlət büdcəsinin xərcləri 1,7 faiz artaraq 3559,1 milyon manat (ÜDM-in 21,5 faizi) təşkil edib. Yanvar-may aylarında büdcənin profisiti 537,1 milyon manat olub ki, bu da ÜDM-in 3,3 faizini təşkil edib.
Strukturda gəlirin 41,9 faizi (1715 milyon manat) Vergilər Nazirliyinin hesabına təmin edilib. Gömrük rüsumları və vergilərindən 365,5 milyon manat (8,9 faizlik xüsusi çəki), digər mənbələrin hesabına gələn gəlir isə 2015,7 milyon manat (49,2 faiz) təşkil edib.
Hesabat dövrü ərzində ƏDV-dən 754,8 milyon manat gəlir daxil olub ki, bu da ümumi gəlirin 18,4 faizini təşkil edir. Mənfəət vergisi 640,6 milyon manat (15,6 faiz), gəlir vergisi 221,7 milyon manat (5,4 faiz), aksiz vergisi 164 milyon manat (4 faiz), əmlak vergisi 35,8 milyon manat (0,9 faiz), yeraltı sərvətlər vergisi 54,2 milyon manat (1,3 faiz), xarici iqtisadi fəaliyyətə görə vergi isə 109,8 milyon manat (2,7 faiz) təşkil edib.
Əhalinin sosial müdafiəsi və təminatına dövlət büdcəsindən yanvar-may aylarında 531,9 milyon manat (14,9 faizlik xüsusi çəki) xərclənib. Təhsilə 412,9 milyon manat (11,6 faiz), səhiyyəyə 131,6 milyon manat (3,7 faiz), prokurorluq, təhlükəsizlik, hüquq-mühafizə orqanlarının saxlanılmasına 228,7 milyon manat (6,4 faiz), iqtisadiyyata investisiya qoyuluşuna 1378,1 milyon manat (38,7 faiz) xərclənib. Qoyulan kapitalın ümumi həcminin 68,1 milyon manatı (1,9 faiz) kommunal xərclərə, 112,8 milyon manat (3,2 faiz) kənd, meşə təsərrüfatı və balıqçılığa, 18,4 faiz isə (0,5 faiz) nəqliyyat və rabitəyə yönəldilib.
Dövlət xərclərinin 33,8 faizi (1203,8 milyon manat) əməkhaqqılar, pensiyalar və maddi yardımın ödənilməsinə sərf edilib.
İyulun 5-nə olan rəsmi məzənnə 0,8038 AZN/USD təşkil edir.
