Azərbaycan, Bakı, 7 iyul /Trend, müxbir Ü.İsmayılova/
Əvvəllər ləğv olunan "Azər-Asiya" Azərbaycan-İran birgə sığorta şirkətinin azərbaycanlı səhmdarları öz paylarını (51 faiz) İranın "Asiya Sığorta" (49 faiz) şirkətinə satıblar. Bu barədə çərşənbə günü "Azərsığorta" şirkəti sədrinin müavini Aftandil Hacıyev bildirib.
"Şirkətin Azərbaycan payının satılması ilə bağlı qərar iyunda keçirilən ümumi iclasda qəbul olunub", - Hacıyev bildirib.
Onun sözlərinə görə, Azərbaycan səhmlərinin satılması prosesi artıq tam başa çatıb və bu yaxınlarda həll ediləsi bəzi məsələlər qalıb.
Hacıyev İran səhmdarlarının planlarından danışaraq qeyd edib ki, "Azər-Asiya" şirkəti səhmdar cəmiyyət qismində öz statusunu saxlayıb və onun sığorta şirkəti qismində fəaliyyətini bərpa etməsi istisna edilmir.
"Şirkətin Azərbaycanda başqa bizneslə məşğul olması da mümkündür", - Hacıyev vurğulayıb.
Azərbaycan Maliyyə Nazirliyi fevralda "Azər-Asiya" birgə sığorta şirkətinə 2002-ci il noyabrın 21-də verilmiş lisenziya fəaliyyətinə dair lisenziyanın müddətinin uzadılmasından imtina edib. Lisenziyanın uzadılmasından imtina edilməsinə əsas səbəb şirkətin 2006-cı il oktyabrın 1-dən 2007-ci il oktyabrın 1-dək olan dövrdə sığorta qanunvericiliyinə və lisenziya tələblərinə uyğunluq fəaliyyətinin yoxlanılmasının nəticələri olub. Yoxlamanın gedişində pozuntu faktları aşkarlanıb.
1998-ci ildən fəaliyyət göstərən və bu ilin fevralında lisenziyasını uzatmış BE&G şirkəti 28 növ sığorta xidməti göstərir. Onlardan dördü icbaridir. Şirkətin nizamnamə kapitalı 800 min manat təşkil edir.
"Azər-Asiya" birgə sığorta şirkəti Azərbaycanın sığorta bazarında 1997-ci ildən fəaliyyət göstərib.
