Azərbaycan, Bakı, 14 iyul /Trend, müxbir İ.Xəlilova/
Azərbaycan hökuməti ortamüddətli perspektivdə ölkənin dəmiryol infrastrukturunun vəziyyətini yaxşılaşdırmaq üçün, təxminən, bir milyard manat həcmində sərmayə qoymağı planlaşdırır. Bu barədə Azərbaycanda dəmir yolu və ticarət üzrə tranzitə yardım layihəsinin rəhbəri, Dünya Bankının davamlı inkişaf sektorunda infrastruktur üzrə mütəxəssis Cerald Oliver (Gerald Ollivier) deyib. Bu, Oliverin Avropa və Mərkəzi Asiyada nəqliyyat layihələrinin kuratoru qismində Azərbaycana son səfəridir.
"Azərbaycan hökumətinin hesablamaları ilə üst-üstə düşən qiymətləndirmələrimizə görə, bu sektorda investisiya tələbatı 1,2 milyard dollara yaxın təşkil edir", - Oliver deyib.- "Bu tələbat çox görünə bilər, lakin onlara dəmir yolunun gətirdiyi gəlirlər kontekstində baxmaq lazımdır".
Onun sözlərinə görə, Azərbaycanın dəmir yolu illik, təxminən, 200-250 milyon manat gəlir əldə edir.
İnvestisiyaların ümumi həcmindən 450 milyon dollar (layihə Azərbaycanın iştirak payı ilə birgə 673,8 milyon dollar həcmində qiymətləndirilir) Azərbaycanda dəmir yolu və ticarət üzrə tranzitə yardım layihəsinin reallaşdırılması üzrə kredit resursları kimi ayrılıb. DB-nin vəsaitlərini Bakıdan Gürcüstan sərhədinədək dəmir yolunun elektrikləşdirilməsinə, lokomotivlərin alınmasına yönəltmək planlaşdırılıb.
"DB-nin vəsaitlərinin ayrılmasına ölkə ilə tərəfdaşlıq strategiyası kontekstində baxılır ki, burada ölkənin təhsil, səhiyyə, yol tikintisi və digər sektorlarında da bütün tələbləri nəzərə alınır", - Oliver bildirib. - "Öz həyat qabiliyyətliliyi və uğurluluğunu sübut edən bütün layihələr üçün həmişə əlavə vəsaitlərin ayrılmasına baxmaq imkanları var. Ona görə də əgər tələb olunarsa, bu məsələyə dəmir yolu layihəsi üçün də baxmaq olar".
Azərbaycan Prezidenti İlham Əliyevin sərəncamı ilə təsdiq olunan 2010-2014-cü illərdə Azərbaycanın dəmiryol nəqliyyatı sisteminin inkişafı üzrə Dövlət Proqramının əsas məqsədləri islahatların davam etdirilməsi və dəmir yollarının kommersiya fəaliyyəti üçün geniş imkanlar yaratmaq üzrə normativ-hüquqi bazanın təkmilləşdirilməsi, dəmiryol infrastrukturunun və dəmiryol parkının müasir tələblərə uyğun yenilənməsi üzrə tədbirlərin reallaşdırılması, Bakı-Tbilisi-Qars dəmir yolunun işə salınmasından sonra həcmi artacaq yüklərin nəqlinin təmin olunmasıdır.
Eləcə də proqramın məqsədinə yük və sərnişin daşımalarının keyfiyyətinin artırılması və təhlükəsizliyinin təmin olunması, nəqliyyat infrastrukturunda elmi-texniki nailiyyətlərin və qabaqcıl texnologiyaların tətbiqi, sərnişin daşımalarının keyfiyyətinin artırılması strategiyasının müəyyən edilməsi və reallaşdırılması, onların gəlirliliyinin artırılması, sabit cərəyanda işləyən yolların şimal hissəsinin bərpası, qərb istiqamətində sabit cərəyan sistemlərinin dəyişən cərəyana dəyişdirilməsi və müvafiq lokomotivlərin alınması, dizel lokomotivlərinin alınması, Bakı və Biləcəri dəmiryol xəstəxanaları istisna olmaqla, əlavə xidmətlərin ayrılması, kadrların hazırlanması və onların sosial təminarı da daxildir.
Proqramın "Azərbaycan Dəmir Yolları" QSC-nin öz vəsaitləri, daxili və xarici investisiyalar, texniki yardımlar və qrantlar, qanunvericiliyə zidd olmayan digər mənbələrin vəsaitləri hesabına maliyyələşdiriləcəyi ehtimal olunur.
