Azərbaycan, Bakı, 15 iyul /Trend, müxbir İ.Xəlilova/
Cümə günü Bakıda Azərbaycan hökuməti ilə Avropa Komissiyası arasında mayın 10-da Aİ Şurası tərəfindən üç Cənubi Qafqaz ölkəsi ilə danışıqların aparılması üzrə təqdim edilən mandat əsasında assosiativ sazişin imzalanması üzrə danışıqların birinci mərhələsi başlayır. Bu barədə cümə axşamı Azərbaycan xarici işlər nazirinin müavini Mahmud Məmmədquliyev bildirib. Cümə axşamı Batumidə assosiasiyalaşma haqqında Gürcüstan-Aİ danışıqlarının birinci plenar sessiyası keçiriləcək.
Danışıqlara Avropa tərəfdən Con Krayer, Azərbaycan tərəfdən isə Mahmud Məmmədquliyev rəhbərlik edəcək. Danışıqlarda iqtisadi və siyasi xarakterli məsələlərin geniş spektri müzakirə olunacaq.
İndiyədək Azərbaycan Aİ ilə tərəfdaşlıq və əməkdaşlıq haqqında bir saziş əsasında əməkdaşlıq edir. Assosiasiyalar haqqında gələcək saziş Azərbaycanla Aİ arasında tərəfdaşlıq və əməkdaşlıq haqqında sazişi əvəz edəcək və prioritet istiqamətlərdə əməkdaşlığın əhəmiyyətli dərinləşməsini nəzərdə tutur.
Aİ ilə assosiativ sazişin imzalanması Azərbaycan, Ermənistan və Gürcüstan üçün azad ticarətin və insanların yerdəyişməsinin təşkili vasitəsi olacaq.
"Bu, Aİ ilə əməkdaşlığı yeni səviyyəyə qaldıracaq, Azərbaycana Avropa ölkələri ilə vahid azad ticarət zonası yaratmağa imkan verəcək", - Məmmədquliyev bundan əvvəl demişdi.
Lakin, onun sözlərinə görə, Aİ-nin tələblərinə görə, iddiaçı ölkə zonasında iştirak etmək üçün Ümumdünya Ticarət Təşkilatının (ÜTT) üzvü olmaq lazımdır. Azərbaycan hələkik ÜTT-nin müşahidəçi ölkəsidir.
Assosiativ sazişin elementlərindən biri olan azad ticarət zonası və viza rejiminin sadələşdirilməsi haqqında sazişin imzalanmasında maraqlı olan Aİ ölkələri ilə əməkdaşlığın dərinləşməsi Avropa bazarlarına sərbəst çıxışa imkan verəcək.
2009-cu il sentyabrın 30-da Brüsseldə üç Cənubi Qafqaz ölkəsinin xarici işlər nazirləri Avropa İttifaqının Cənubi Qafqaz ölkələri ilə əməkdaşlıq üzrə Şurasının illik sessiyasında iştirak edib. Bu görüşdə də Qafqaz ölkələrinin Aİ-yə assosiativ üzvlüyünün perspektivləri haqqında qərar qəbul olunub ki, bu da həmin ölkələrdə münaqişələrin həlli və daxili islahatların keçirilməsi üçün ən səmərəli stimuldur.