Azərbaycan, Bakı, 4 avqust /Trend, müxbir Ü.İsmayılova/
Azərbaycan Qiymətləndiricilər Cəmiyyəti 2011-ci ildə Azərbaycanda milli qiymətləndirmə standartlarına riayət olunması üzərində nəzarəti həyata keçirməyə hazırlaşır. Bu barədə cəmiyyətin icra aparatının rəhbəri Amin İsmayılov çərşənbə axşamı bildirib.
"2010-cu ilin sonundan Azərbaycan Qiymətləndiricilər Cəmiyyəti yerli qiymətləndiricilərin standartlara riayət etməsi üzrə normativ sənədlərin hazırlanmasına başlamaq niyyətindədir", - İsmayılov deyib.
Onun sözlərinə görə, Azərbaycanda milli qiymətləndirmə standartlarına riayət olunması üzərində nəzarət Standartlaşdırma, Metrologiya və Patent üzrə Dövlət Komitəsi ilə birgə həyata keçiriləcək.
Hazırkı mərhələdə qiymətləndiricilər tərəfindən milli standartlara əməl olunması ilə bağlı vəziyyətə toxunan İsmayılov deyib ki, hələlik yoxlama aparmaq tezdir. Çünki bazar yerli standartlara uyğunlaşma dövrünü yaşayır. Bununla əlaqədar nəzarətin həyata keçirilməsi gələn ilə planlaşdırılıb.
"Bu gün qiymətləndiricilərin əksəriyyəti hələ uyğunlaşma prosesindən keçir və onlar milli standartlar, eləcə də artıq milli standartların tətbiqinə başlayan sertifikatlaşdırılmış qiymətləndiricilər haqqında tam məlumatlandırılmayıblar", - İsmayılov bildirib.
Standartlaşdırma, Metrologiya və Patent üzrə Dövlət Komitəsi 2009-cu ilin dekabrında Qiymətləndiricilər Cəmiyyətinin beynəlxalq standartların bazasında işləyib-hazırladığı doqquz milli qiymətləndirmə standartını təsdiqləyib.
Azərbaycanda qiymətləndirmə fəaliyyəti 1995-ci ildə qəbul olunmuş "Qiymətləndirmə fəaliyyəti haqqında" qanunla tənzimlənir. Azərbaycanda qiymətləndirmə fəaliyyətinin keyfiyyətinin artırılması ilə bağlı işlər Azərbaycan və Orta Asiyada ipoteka kreditlərinin verilməsinin inkişafı üzrə IFC proqramı çərçivəsində həyata keçirilir.
İndiyədək yalnız iki imtahan keçirilib, üçüncüsü uğurlu olmayıb. Qiymətləndiricilərin sertifikatlaşmasında iştirak edən otuz nəfərdən yalnız yeddisi sertifikat ala bilib.