Azərbaycan, Bakı, 6 avqust /Trend, müxbir Ü.İsmayılova/
Maliyyə Nazirliyi yanında Dövlət Sığorta Nəzarəti Xidməti kənd təsərrüfatı sığortasının təkmilləşdirilməsi mexanizmi haqqında təklif hazırlayır. Bu barədə cümə günü Dövlət Sığorta Nəzarəti Xidmətinin rəhbəri Namiq Xəlilov bildirib.
"Yeni mexanizmin işlənməsi bu il baş vermiş təbii fəlakətlər - daşqınlar, yanğınlar və s. üzündən daha da aktual olub", - Xəlilov hesab edir.
Onun sözlərinə görə, hazırlanma prosesi başa çatandan sonra, təklif təsdiq olunmaq üçün Nazirlər Kabinetinə göndəriləcək.
Xəlilov onu da bildirib ki, yerli sığortaçılar öz fəaliyyətlərində risklərin yüksək səviyyəsinə görə sığortanın bu növünə xüsusi diqqət ayırmırlar və işlənib-hazırlanan təklif Azərbaycanda kənd təsərrüfatı sığortasının inkişafı üzrə əlavə təkan olacaq.
Bundan əvvəl Azərbaycanda yeganə dövlət kommersiya şirkəti "Azərsığorta" QSC-nin sədri Məmməd Məmmədov deyib ki, Azərbaycan regionlarında əhali sığorta xidmətlərindən kifayət qədər istifadə etmir.
"Son vaxtlar baş vermiş təbii fəlakətlər (sellər, torpaq sürüşmələri, yanğınlar və s.) kənd əhalisinin əmlakına ciddi ziyan vurub", - Məmmədov bildirib. - "Lakin əhalinin əmlakı sığortalanmadığından, onlar yalnız ölkənin dövlət büdcəsindən yardım ala bilərlər".
Onun sözlərinə görə, Azərbaycan iqtisadiyyatı bazar iqtisadiyyatı prinsipləri əsasında qurulub. Ona görə də hər bir sahibkar və vətəndaş sığorta zəmanəti almaq üçün öz əmlakını və sağlamlığını sığortalamalıdır.
"Təəssüflə qeyd etmək olar ki, ölkə ərazisində fəaliyyət göstərən fermer təsərrüfatları öz təsərrüfatlarının sığortalanmasına lazımi diqqət göstərmirlər", - Məmmədov deyib.
Bundan əvvəl "Azərsığorta" QSC kənd təsərrüfatı sığortası üzrə əlavə vəsaitlərin verilməsi haqda ölkə hökumətinə təklif təqdim edib. Şirkətin təklifi kənd təsərrüfatı sahəsində sığorta müqaviləsinin 100 faiz ödənilməsini nəzərdə tutur, halbuki bu sahədə sığorta ödənişi 50 faiz təşkil edir. Təklifin hazırlanmasına səbəb fermerlərin əksəriyyətini öz əmlakını sığorta etməməsi ilə əlaqədardır. Onlar bunu əlavə vəsaitin olmaması ilə izah edirlər.
Azərbaycanda "Kənd təsərrüfatına yardım və inkişaf haqqında" Qanuna yayda təsdiqlənən əlavələrə görə, kənd təsərrüfatı sığortasında sığorta haqlarının maliyyələşdirilməsinin dövlət payı 25 faizdən 50 faizə qaldırılıb. Dövlət büdcəsindən sığorta edilən kənd təsərrüfatı bitkilərinin siyahısına buğda, arpa, qarğıdalı, günəbaxan, kartof, şəkər çuğunduru, tərəvəz (göyərti istisna olmaqla) daxil edilib.
Kənd təsərrüfatı sığortası üzrə orta tarif ildə 1500 manata yaxındır.Torpağın bir hektarından orta gəlir ildə 25 min manata bərabərdir.
Avqustun 6-da rəsmi məzənnə 0,8034 AZN/USD təşkil edir.
