Azərbaycan, Bakı, 11 avqust /Trend, müxbir A.Axundov/
"Azersun Holding" şirkəti və Azərbaycan İnvestisiya Şirkətinin (AİŞ ) təsis etdikləri "Azərbaycan duzu İstehsalat Birliyi" QSC Azərbaycanın yodlaşdırılmış duza olan tələbatını tam ödəməyə hazırdır. Bu barədə çərşənbə axşamı zavodun direktoru Əlikamal Yılmaz müəssisədəki istehsalın gedişi ilə tanışlıq zamanı bildirib.
"Bu gün Azərbaycanın yodlaşdırılmış duza olan tələbatı 30-50 min ton təşkil edir; zavod tam gücü ilə işləməyə başlayanda nəinki ölkədə olan tələbatı ödəmək, hətta bu məhsulu ixrac etmək də mümkün olacaq. İlk növbədə, Gürcüstana, MDB ölkələrinə satışın həyata keçirilməsi planlaşdırılır", - Yılmaz bildirib.
Zavod direktorunun sözlərinə görə, bu günə zavodun sutkalıq gücü 100 ton təşkil edir, lakin yaxın vaxtlarda müvafiq avadanlıqların quraşdırılmasından sonra bu göstərici 300 tonadək artırılacaq. Bu zaman istehsalın illik həcmi 90 min tona çatdırılacaq.
Bu gün duz sifarişçilərindən biri ölkənin Müdafiə Nazirliyidir.
Zavodun direktoru ölkənin regionlarında analoji istehsalın yaradılmasına zərurət görmür, çünki duzun hasil edildiyi Masazır gölü yaxınlığında yerləşən "Azərbaycan duzu" öz gücü hesabına ölkənin daxili tələbatını tam ödəyə bilər. Müəssisədə "Azərduz" və "Bizim duz" ticarət markaları altında məhsul buraxılır.
Zavodun tikintisinə QSC-nin təsisçiləri tərəfindən 16 milyon manat həcmində sərmayə qoyulub və istehsalın həcminin artırılması üçün daha dörd milyon manat investisiya qoyulması nəzərdə tutulub. İnvestisiyaların ümumi həcmindən 25 faiz Azərbaycan İnvestisiya Şirkətinin, yerdə qalan vəsait isə "Asersun Holding"in payına düşür.
Zavod gecə-gündüz işləyir. Müəssisədə 125 nəfər çalışır. Onların orta aylıq əmək haqları 400 manat təşkil edir.
Duz istehsalı zavodunun Qafqazda analoqu yoxdur və müəssisənin məhsulları rəqabətqabiliyyətlidir. Çünki duz müasir texnologiyalardan istifadə etməklə istehsal olunur.
Avqustun 11-də rəsmi məzənnə 0,8035 AZN/USD təşkil edir.
