Azərbaycan, Bakı, 11 avqust /Trend, müxbirlər E.İsmayılov, N.İsmayılova/
Dünya Bankı (DB) və Azərbaycanın nəqliyyat sektorundakı layihələrin maliyyələşdirilməsinə bir milyard dollar investisiya qoyub. Bu barədə çərşənbə günü Bakıda səfərdə olan DB-nin yeni meneceri Cozef Ouen bildirib. O, Bakı-Şamaxı-Muğan ikizolaqlı və dördzolaqlı (üçüncü magistral avtomobil yolu) avtomobil yolunun genişləndirilməsi layihəsi çərçivəsində kredit sazişi imzalanmasında iştirak edib.
"DB Azərbaycanda nəqliyyat layihələrinin maliyyələşdirilməsinə sadiqliyini qoruyur. Ölkənin şimal və cənubun kəsişməsində yerləşdiyini nəzərə alaraq, o, yük və elektrik enerjisinin nəqlində tranzit qismində çıxış etmək üçün nadir imkanlara malikdir", - Ouen qeyd edib.
Nümayəndənin fikrincə, ölkə bu imkanlardan istifadə etməlidir və öz nəqliyyat şəbəkəsini təkmilləşdirməlidir.
"Bunlarla yanaş, yol və infrastrukturların inkişafı yoxsulluq səviyyəsinin azaldılması istiqamətində, iqtisadiyyatın qeyri-neft sektorunun stimullaşdırılması, regionla inkişaf, ticarət və tranzitin təşviqi, xarici bazarlara çıxışın keyfiyyətinin yaxşılaşdırılması mühüm vasitə hesab edilir", - ölkə üzrə menecer deyib.
Azərbaycanın nəqliyyat naziri Ziya Məmmədovun sözlərinə görə, bu gün imzalanmış kredit sazişi nəqliyyat sektorunda DB ilə əməkdaşlığın genişləndirilməsi istiqamətində mühüm rol oynayacaq.
"Bu öz növbəsində daşımaların təhlükəsizliyinin təmin edilməsinə, bu regionda turizmin inkişaf etdirilməsinə, eləcə də bu istiqamətdə fəaliyyəti həyata keçirilən müəssisələrin inkişafına, ölkənin tranzit imkanlarının artmasına imkan verəcək", - nazir bildirib.
DB-nin Azərbaycandakı nümayəndəliyinin rəhbəri təsdiq edib ki, üçüncü magistral yolun təkmilləşdirilməsi üzrə yeni kredit sazişi (onun maliyyələşməsinə bank 241,6 milyon dollar ayırıb) DB ilə Azərbaycan arasında əməkdaşlığın daha da genişləndirilməsinə təkan verəcək.
Azərbaycan 1992-ci ildən DB-nin üzvüdür. Bankla əməkdaşlıq ərzində ölkəyə 47 layihənin maliyyələşdirilməsi üçün 2,5 milyard həcmində kredit ayrılıb. 2008-ci ildə bank tərəfindən 13 layihənin maliyyələşdirilməsinə 1,251 milyard dollar yönəldilib. Strategiyanın son iki ilində (2009-10-cu illər) DB ölkəyə bir milyard dollardan çox vəsait ayırmağa hazır olduğunu bildirib. Bu vəsait artıq kommersiya şərtləri ilə - Beynəlxalq Yenidənqurma və İnkişaf Bankının xətti ilə verilməli idi. Lakin bank indiyədək Azərbaycanı paralel olaraq güzəştli şərtlərlə maliyyələşdirir.