Azərbaycan, Bakı, 16 avqust /Trend, müxbir N.İsmayılova/
2010-cu ilin I yarısında Azərbaycan Respublikasının Mərkəzi Bankı öz siyasətini qlobal iqtisadi artımın ləng bərpası və dünya ölkələri üzrə qeyri-bərabər getməsi, beynəlxalq maliyyə-valyuta bazarlarında qeyri-stabilliyin artması, dünya neft bazarında əlverişli konyukturun saxlanmasını ölkə iqtisadiyyatının sabit artım dinamikası şəraitində həyata keçirib. Bu barədə bankın idarə heyətinin 2010-cu ilin birinci yarısının yekunları üzrə keçirilən iclasının nəticələri haqqında bazar ertəsi yayılan məlumatında deyilir.
Dünyanın aparıcı valyutalarının kəskin volatilliyi şəraitində manatın ABŞ dollarına qarşı məzənnəsi cəmi 0,04% dəyişərək, ümumən sabit səviyyədə qalıb. Tədiyə balansının əhəmiyyətli profisiti manatın ABŞ dollarına qarşı məzənnəsinin sabitliyinin əsas makroiqtisadi faktoru olub. Manatın məzənnəsinin sabitliyi həmişə olduğu kimi, cari ildə də ölkədə inflyasiyanın, iqtisadi subyektlərin xarici borc yükünün və dollarlaşmanın artmamasına və bütövlükdə, əhalinin real pul gəlirlərinin qorunmasına imkan verib.
İqtisadi tsikldəki mövcud meyillər şəraitində işgüzar aktivliyin və iqtisadi artımın dəstəkənməsi məqsədilə Mərkəzi Bank faiz dəhlizinin parametrlərini və məcburi ehtiyat normalarını dəyişməmiş, pul kütləsinin artım mənbələrini qorumuşdur. Əmanətlər üzrə faiz dərəcələrinin azaldılmasının təşviqi siyasəti davam etdirilib. Bu şəraitdə yarım il manatla geniş mənada pul kütləsi 7,5% artmış, faiz dərəcələrinin azalmağa doğru meyillənməsinə şərait yaranmışdır.
Mərkəzi Bankın pul siyasətinin əsas məqsədlərindən olan inflyasiya səviyyəsi cari ilin altı ayında ötən ilin müvafiq dövrünə nisbətən 4,9% təşkil edib.
Dövr ərzində bank sektorunda maliyə sabitliyinin möhkəmləndirilməsi məqsədilə Mərkəzi Bank nəzarət və tənzimləmə çərçivəsini daha da təkmilləşdirib. Nəticədə, bank sistemi maliyyə dayanıqlılığını qoruyaraq inkişafını davam etdirib. 2010-cu ilin ötən altı ayı ərzində bank sisteminin aktivləri 4,4%, kredit portfeli isə 5,2% artıb. Əhalinin əmanətlərinin artımı 9,8% olub.
Qeyd olunanları, habelə makroiqtisadi proqnozları nəzərə alaraq, Mərkəzi Bankın idarə heyəti uçot dərəcəsinin, faiz dəhlizinin parametrlərinin və məcburi ehtiyat normalarının dəyişməz saxlanılmasını, manatın məzənnəsinin sabit səviyyədə saxlanmasına yönəlmiş siyasətin davam etdirilməsini məqsədəuyğun sayıb.
