Azərbaycan, Bakı, 2 sentyabr /Trend, müxbir N.İsmayılova/
Azərbaycanda tikinti materiallarının nəzərəçarpacaq qiymət artımı qeydə alınmayıb. Bu barədə cümə axşamı jurnalistlərə Azərbaycan İqtisadi İnkişaf Nazirliyi yanında Antiinhisar və İstehlakçıların Hüquqlarının Müdafiəsi Dövlət Xidmətinin rəhbəri Zahid İsayev deyib.
"Tikinti materialları bazarında qiymət artımı yalnız nəzərəçarpmayacaq səviyyədə qeydə alınıb ki, bu da təhlükə törətmir", - İsayev bildirib.
Onun sözlərinə görə, Dövlət Xidməti həm ərzaq malları bazarında, həm də tikinti materialları bazarında monitorinqlər aparır.
"İyulda Bakıda tikinti materiallarının qiyməti iyunla müqayisədə 0,48 faiz azalıb", - "Əmlak Bazarı İştirakçıları" İctimai Birliyinin məlumatında deyilir.
İyulda ötən rübün analoji dövrünə nisbətdə qiymət fərqi - 3,5 faiz, yanvarla müqayisədə isə +15,9 faiz təşkil edib. Ötən ilin analoji dövrü ilə müqayisədə 20,2 faiz qiymət artımı müşahidə edilir.