Azərbaycan xarici investisiyaları cəlb etmək üçün yaxşı potensiala malikdir – Belçika parlamentinin üzvü
Azərbaycan, Bakı, 17 sentyabr /Trend, müxbir N.İsmayılova/
Azərbaycan ölkə iqtisadiyyatına xarici investorları cəlb etmək üçün yaxşı potensiala malikdir. Bu barədə cümə günü Bakıda Belçika parlamentinin üzvü, iş adamı İvan Sabbe deyib. O, "İqtisadi inkişafın Azərbaycan modeli" beynəlxalq konfransında iştirak edib.
"Ölkənin neft-qaz sektorunun potensialının gələcək inkişafı üçün də imkanı var və bu sahədən əldə edilən gəlirlər digər sektorlara uzunmüddətli investisiyalar şəklində yönələ bilər", - Saabe qeyd edib.
Onun sözlərinə görə, Azərbaycanda böyük potensial, təbii resursların böyük ehtiyatı var, Avropa standartlarının tətbiqi həyata keçirilir. Bütün bunlar iqtisadi infrastrukturun qurulmasına xarici investorların cəlb edilməsinə xidmət edir.
Cümə günü iqtisadi inkişaf naziri Şahin Mustafayevin beynəlxalq konfransda çıxışı zamanı dediyinə görə, indi Azərbaycan iqtisadiyyatının Cənubi Qafqaz ölkələri iqtisadiyyatında payı 75 faizi ötür.
Onun sözlərinə görə, Azərbaycan indi müstəqil, sabit, öz resurslarına arxalanan, dünya iqtisadiyyatına sürətlə inteqrasiya edən iqtisadiyyata malikdir.
"Ölkə iqtisadiyyatının artımının təmin edilməsi məqsədilə Azərbaycanda bundan sonra da makroiqtisadi sabitlik qorunacaq, enerji, ekologiya və ərzaq təhlükəsizliyi üzrə mütəmadi tədbirlər keçiriləcək, ölkənin diversifikasiyalaşdırılması genişləndiriləcək, biznes mühiti təkmilləşdiriləcək və aqrar sektorun inkişafı saxlanılacaq", - nazir bildirib.
Onun sözlərinə görə, bu siyasət insan kapitalının inkişafına, ölkədə işsizlik səviyyəsinin minimuma çatdırılmasına, yoxsulluq səviyyəsinin azaldılmasına, dövlət büdcəsinin xərclərinin sosial istiqamətlərinin artırılmasına yönəlib ki, bu da son nəticədə əhalinin yaşayış səviyyəsinin artmasına gətirib çıxarır.
