Azərbaycan, Bakı, 29 sentyabr /Trend, müxbir İ.Xəlilova/
Azərbaycan Maliyyə Nazirliyi ölkənin sığorta şirkətlərinin kapitallaşdırılma qrafikinə dəyişikliklər etməyə hazırdır. Bu barədə çərşənbə günü maliyyə naziri Samir Şərifov deyib.
"Biz bu məsələyə baxmışıq və qərar qəbul etmək üçün kapitallaşdırılma qrafikinin dəyişilməsi üzrə təkliflər Maliyyə Nazirliyinin kollegiyasına verilib, - nazir bildirib. - Qrafikə dəyişikliklər edilməsi mümkündür və sığorta şirkətlərinin kapitallaşdırılması haqqında qərar hazırkı mərhələdə olduğu kimi radikal olmayacaq".
Nazir sığortaçıların ümumi kapitala minimum tələbinin növbəti artımı üçün müddətin bir-iki ilə uzadılmasını istisna etməyib.
2011-ci il yanvarın 1-nə sığorta şirkətləri üçün ümumi kapitalın minimum ölçüsü 3,5 milyon manat səviyyəsində müəyyən olunub.
Bundan əvvəl Azərbaycan Sığortaçıalr Assosiasiyası Maliyyə Nazirliyinə sığorta şirkətlərinin kapitallaşdırılma qrafikinə dəyişikliklər edilməsi haqqında təkliflə müraciət edib ki, bu qrafikə əsasən, 2011-ci il yanvarın 1-nə ümumi kapitalın minimum ölçüsü 3,5 milyon manat təşkil etməlidir. Sığortaçılar kapitalın bu səviyyəyə çatdırılma müddətini iki il - 2013-cü ilə qədər uzatmağı təklif edirlər.
Sığorta şirkətlərinin məcmu kapitallarına dair təsdiqlənmiş minimum tələblərə görə, 2010-cu il yanvarın 1-dən sığorta şirkətlərinin kapitalı 2 milyon manata, təkrar sığorta şirkətlərinin kapitalı 4 milyon manata, 2011-ci il yanvarın 1-dən, müvafiq olaraq, 3,5 milyon manata və 7 milyon manata, 2012-ci il yanvarın 1-dən isə müvafiq olaraq, 5 milyon manata və 10 milyon manata çatdırılmalıdır.
Azərbaycanda 27 sığorta və bir təkrar sığorta şirkəti fəaliyyət göstərir. Bu gün təxminən 12 sığorta şirkətinin kapitalı gələn ilin əvvəlinə olan normativ tələbi ötür.