Azərbaycan, Bakı, 6 oktyabr /Trend, müxbir N.İsmayılova/
Azərbaycan bankı "AccessBank" 2010-cu ilin yekunlarına görə depozit portfelinin 100 faizlik artımına nail olmaq niyyətindədir. Bu barədə çərşənbə günü bankın baş meneceri Endryu Pospilovski deyib.
"Bu il bankın depozit portfeli 70 faizdən çox artıb və biz ilin yekununa görə portfelin 100 faizlik artımını gözləyirik. Depozitlərin həcminin artımı kredit portfelinin maliyyələşməsinin artımı üçün kifayət edir, odur ki, bankın xarici borcları cəlb etməsinə ehtiyacı yoxdur", - Pospilovski qeyd edib.
Onun sözlərinə görə, bankın cəlb etdiyi vəsaitlərin ümumi səviyyəsi ötən il eyni səviyyədə qalıb.
"Bu günə bankın depozit portfeli 150 milyon dollar təşkil edir ki, bu da kredit portfelinin 40 faizindən çoxunu maliyyələşdirir", - o bildirib.
Hazırda bankın kredit portfeli 350 milyon dollardan çoxdur, bankın kredit alan müştərilərinin sayı isə 120 mini ötür.
"АccessBank"ın missiyası aşağı və orta gəlirli Azərbaycan ailələrinə, eləcə də mikro və kiçik sahibkarlara maliyyə xidmətləri göstərməkdən ibarətdir. "АccessBank" beynəlxalq "Fitch" reytinq agentliyi tərəfindən Azərbaycan bankları arasında ən etibarlı bank adına layiq görülüb (BB+), həmçinin, "Euromoney" Nəşriyyat Qrupu tərəfindən "2010-cu ildə Azərbaycanın ən yaxşı bankı" kimi tanınıb. "AccessBank" 100% xarici kapitala malikdir və 6 beynəlxalq maliyyə institutuna məxsusdur. Bunlar Avropa Yenidənqurma və İnkişaf Bankı, Beynəlxalq Maliyyə Korporasiyası, Qara dəniz Ticarət və İnkişaf Bankı, Kfw Development Bank - Almaniya Hökumətinin İnkişaf Bankı (hər biri 20%), mikromaliyyələşdirmə sahəsində strateji maliyyəçi rolunda çıxış edən "Access Holding" (16,5%) və Almaniyanın LFS Financial Systems GmbH (3,5%) şirkətləridir.
