Azərbaycan, Bakı, 14 oktyabr /Trend, müxbir A.Axundov/
2011-ci ildə Azərbaycanın sığorta bazarının həcminin artacağı gözlənilir. "Alfa Sığorta" sığorta şirkətinin Direktorlar Şurasının sədri Xəyal Məmmədxanlı belə hesab edir.
"Belə gözləntilər üçün bir neçə səbəb var. Birincisi, bu, əhalinin sığortalanmaya artan marağı və etibarı sayəsində təmin olunacaq. İkincisi, sığorta şirkətləri ölkə regionlarında işləməyə başlayırlar", - Məmmədxanlı qeyd edib.
Onun sözlərinə görə, 2011-ci ildə bazar artımı üçün başlıca zəmin sığorta sahəsində qanunvericilik aktlarının qəbul edilməsi olacaq.
"Gələn il sığortanın icbari növləri üzrə üzvlük haqlarının və limitlərin artırılması, eləcə də "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" qanunun tətbiq olunması nəzərdə tutulub. Mənə elə gəlir ki, bu qanunun işləmə mexanizmi ilin sonunadək hazırlanacaq", - Məmmədxanlı vurğulayıb.
[Gələn ilin dövlət büdcəsindən istehsalatda bədbəxt hadisələrdən icbari sığortalanmaya 30 milyon manat ayrılması planlaşdırılır.]
Azərbaycan Maliyyə Nazirliyi nəzdində Dövlət Sığorta Nəzarəti Xidmətinin məlumatına görə, yanvar-avqust aylarında Azərbaycanda fəaliyyət göstərən sığorta şirkətlərinin yığımlarının ümumi həcmi 103,6 milyon manat təşkil edib, ödənişlər isə 30,92 milyon manat məbləğində həyata keçirilib.
Ötən ilin analoji dövrü ilə müqayisədə sığorta haqlarının ümumi həcmi 15,98 faiz (2009-cu ilin yanvar-avqustunda yığımlar 122,67 milyon manat səviyyəsində olub) aşağı düşüb, ödənişlər 8,89 faiz (33,94 milyon manat) azalıb.
2009-cu ildə şirkətlər 161,31 milyon manat məbləğində sığorta haqları yığıblar, 53,07 manat məbləğində ödəmələr ediblər.