Azərbaycan, Bakı, 18 oktyabr /Trend, müxbir A.Axundov/
Yaxın həftələr ərzində "Azəri-Çıraq-Günəşli" blokunda neft hasilatının artırılmasını nəzərdə tutan "Chirag oil project" (COP) layihəsi üzrə risklərin sığortalanması çərçivəsində müqavilələrin imzalanması başa çatacaq. Bu barədə bazar ertəsi "Paşa Sığorta" sığorta şirkətinin İdarə Heyətinin sədri Nofəl Rzayev deyib.
"Paşa Sığorta" COP-un yerli sığorta tərəfdaşı seçilib və ABŞ-ın "Marsh" sığorta brokeri ilə birgə layihənin sığorta hissəsinin işlənməsini aparır.
"Bu günə hələ ki "Chirag oil project" layihəsi çərçivəsində tikinti işlərinin sığortalanması üzrə müqavilələr imzalanıb. Hazırda isə istismar risklərinin sığortalanması üzrə müqavilələrin imzalanması qalıb. Yaxın həftələr ərzində bu proses də başa çatacaq", - Rzayev qeyd edib.
Onun sözlərinə görə, tikinti komponentlərinin sığortalanması üzrə müqavilə bütün tikinti dövrü üçün imzalanıb.
"Tikinti işləri dördillik sığorta edilib, istimar riskləri isə hər il sığortalanır", - Rzayev vurğulayıb.
"Paşa Sığorta" ASC 2008-ci ildən etibarən Xəzərin Azərbaycan sektorunda "Azəri-Çıraq-Günəşli", "Şahdəniz" və Bakı-Tbilisi-Ceyhan layihələrinin işlənməsi üzrə yerli sığorta tərəfdaşıdır.
"Paşa Sığorta" Londonda yerli strateji sığorta tərəfdaşı roluna serifikatlaşdırmadan 2008-ci ilin iyulunda keçib.
Sığortaçı və neft-qaz layihələrinin operatoru - BP şirkəti arasında birgə saziş əməliyyat risklərinin ödənilməsini, məsuliyyət və terrorizm risklərini, "Azəri-Çıraq-Günəşli" yataqlar blokunun və "Şahdəniz" qaz-kondensat yatağının işlənməsi layihəsində əmlak risklərini, eləcə də Bakı-Tbilisi-Ceyhan boru kəmərinin istismar riskləri üzrə sığorta polislərinin rəsmiləşdirilməsini nəzərdə tutur.
"Paşa Sığorta" "Marsh" broker şirkəti və aparıcı beynəlxalq təkrar sığorta şirkətləri ilə tərəfdaşlıq edir.
"Paşa Holding" qrupuna daxil olan "Paşa Sığorta" korporativ və fərdi müştərilərə 30 növ sığorta xidməti göstərir. "Paşa Sığorta" 28 milyon manatlıq məcmu aktivi ilə kapitallaşdırma həcminə görə ölkənin üç aparıcı sığortaçısı sırasına daxil olmaqla, eyni zamanda, ölkənin sığorta sektorunda biznesin rentabelliyinin ən yüksək göstəricilərini saxlayır. Şirkətin nizamnamə kapitalı 20 milyon manat təşkil edir.
2007-ci ildən "Paşa Sığorta" Böyük Britaniyanın "Moody International" agentliyi tərəfindən sığorta məhsullarının ISO 9001:2000 keyfiyyət idarəetmə standartlarına və xidmətlərinə uyğunluq səviyyəsinə görə sertifikatla təltif olunub. 2009-cu ildən etibarən "Paşa Sığorta" BMT-nin insan hüquqlarının, ətraf mühitin müdafiəsi və korrupsiyanın qarşısının alınması üzrə Qlobal Müqaviləsinin (UN Global Compact Initiative) iştirakçısıdır.
Maliyyə Nazirliyi nəzdində Dövlət Sığorta Nəzarəti Xidmətinin hesabatına əsasən, yanvar-avqust aylarında "Paşa Sığorta"nın sığorta yığımlarının həcmi 7,08 milyon manat, ödəniş həcmi isə 1,59 milyon manat təşkil edib. Sentyabrda daxilolmalar sayəsində şirkətin sığorta haqlarının ümumi həcmi 10 milyon manatı ötüb. Halbuki 2010-cu ilin yekunlarına görə proqnozlar 10,5 milyon manat təşkil edib.
Oktyabrın 18-nə olan rəsmi məzənnə 0,8015 AZN/USD təşkil edir.