Аzərbaycan, Bakı, 8 noyabr /Trend, müxbir N.İsmayılova/
Sentyabr ayında Azərbaycan banklarının depozit bazası 2,7 faiz, 2009-cu ilin sentyabrı ilə müqayisədə isə 11,7 faiz artıb. Bu barədə bazar ertəsi Azərbaycan Mərkəzi Bankının (AMB) məlumatında deyilir.
AMB-nin məlumatına görə, bank depozitlərinin, hüquqi və fiziki şəxslərin əmanətlərinin ümumi həcmi sentyabrın sonuna avqustun sonuna olan 4589,4 milyon manata nisbətdə 4715,2 milyon manat təşkil edib. 2009-cu il oktyabrın əvvəlində isə bu göstərici 4220 milyon manat olub. Ümumi həcmin 2128,2 milyon manatı manat vəsaitinin payına, 2587 milyon manatı isə valyutanın payına düşüb.
Sentyabr ayı ərzində fiziki şəxslərin əmanətləri 2,8 faiz, hüquqi şəxslərin depozitlərinin həcmi isə 2,6 faiz artıb. 2009-cu ilin sentyabrı ilə müqayisədə fərdi müştərilərin depozitləri 32 faiz, korporativ müştərilərin depozitləri isə 8,7 faiz artıb.
Sentyabrın sonuna fiziki şəxslərin ölkənin banklarındakı əmanətlərinin həcmi 2798,3 milyon manat təşkil edib. Bu göstərici avqustun sonuna 2720,8 milyon manat, 2009-cu il oktyabrın 1-nə isə 2120,7 milyon manat olub.
Sentyabrın sonuna hüquqi şəxslərin depozitlərinin həcmi 1916,8 milyon manat təşkil edib. Avqustun sonuna bu göstərici 1868,6 milyon manat, 2009-cu il oktyabrın 1-nə isə 2099,2 milyon manat təşkil edib.
Noyabrın 8-nə olan rəsmi məzənnə 0,7999 AZN/USD təşkil edir.
