Azərbaycan, Bakı, 1 dekabr /Trend, müxbir N.İsmayılova/
Azərbaycanın poçt operatoru "Azərpoçt" MMC-yə uzaq perspektivdə əmanətlərin qəbuluna icazə verilə bilər. Bu barədə çərşənbə günü Azərbaycan Mərkəzi Bankının (AMB) idarə heyətinin sədri Elman Rüstəmov deyib.
"Dünya təcrübəsinə əsasən, maliyyə xidmətləri göstərilməsinin ilkin mərhələsində poçt təşkilatlarının vəsaitləri kreditlərin verilməsi yolu ilə deyil, resurslarını daha sağlam maliyyə institutlarına vermək üçün qiymətli kağızlara qoyulmaq yolu ilə yerləşdirilə bilər və bununla da gəlir əldə oluna bilər, - Rüstəmov bildirib. - Bu halda hökumətin mənfəəti əlavə resursların cəlb edilməsində olacaq".
Onun sözlərinə görə, poçt operatoru kredit əməliyyatlarına hazırlıq işlərini başa vurduqdan və öz menecment riskini lazımi səviyyəyə çatdırdıqdan sonra başlaya bilər.
"Dünya təcrübəsinin göstərdiyi kimi, bu uzun prosesdir", - AMB sədri bildirib.
Bu gün "Azərpoçt"un poçt filiallarının təxminən 70 faizi yenidən qurulub. Əsas məqsəd Azərbaycanın bütün poçt sistemini əhatə edən kompüter-informasiya mərkəzinin yaradılmasıdır. Eləcə də poçt şöbələri vasitəsilə əhaliyə bank xidmətləri göstərmək üçün kadrların hazırlanması məsələsi həll olunur, yeni əməliyyat sistemi hazırlanıb.
Bu gün poçt rabitəsi operatoruna AMB-dən alınan lisenziya əsasında bütün bank əməliyyatlarının (kreditlərin verilməsindən başqa) göstərilməsi imkanı verilib.
Hazırda "Azərpoçt"un poçt şöbələrinin sayı 1600-ü keçir (onların 340-ı şəhərlərdə, rayon mərkəzlərində və qəsəbələrdə, qalanları isə kənd yerlərində əhaliyə xidmət göstərir).