Azərbaycan, Bakı, 6 dekabr /Trend, müxbir N.İsmayılova/
Cari ilin yanvar-noyabr ayları ərzində ölkənin Mərkəzi Bankı yanında Azərbaycan İpoteka Fondunun (AİF) xətti ilə 87,3 milyon manat məbləğində kredit verilib. Bu barəadə bazar ertəsi AİF-nin məlumatında deyilir.
Banklar tərəfindən əvvəl verilmiş kreditlərin təkrar maliyyələşdirilməsinin ümumi həcmi 81,3 milyon manat təşkil edib. 2010-cu ildə sosial ipotekaların maliyyələşdirilməsi üçün dövlət büdcəsindən ayrılan 14 milyon manatdan ilin əvvəlindən artıq 11,96 milyon manatı verilib.
Verilən kreditlərin ümumi həcmindən gənclərin və gənc ailələrin payına 72 faiz (borc götürənlərin 41 faizi 18-29 yaşlarında, 31 faizi - 30-35 yaşlarındadır) təşkil edir. Kreditlərin 28 faizi 36 yaşdan yuxarı borcgötürənlərin payına düşür.
Azərbaycanda AİF-in xətti ilə adi ipotekanın verilməsinin maksimum həddi 50 min manat təşkil edir və səkkiz faiz dərəcə ilə maksimum 25 il müddətinə verilir. Sosial ipoteka 35 min manat təşkil edir və dörd faiz dərəcə ilə maksimum 30 il müddətinə verilir. Adi və güzəştli kreditlər üçün ilkin ödəniş 15 faizdir.
Kreditlər milli valyuta - manatla və yalnız Azərbaycan vətəndaşlarına verilməlidir, ipotekanın predmeti yalnız mənzil və şəxsi evlər ola bilər, ipoteka kreditinin məbləği ipoteka üçün girov qoyulan daşınmaz əmlakın bazar qiymətinin 85 faizini ötməməlidir, kreditə görə aylıq ödəniş borc alanın aylıq gəlirinin 70 faizini ötməməlidir.
Güzəştli şərtlər şəhid, milli qəhrəmanlar və məcburi köçkün ailələrinin üzvlərinə, ən azı, üç il iş təcrübəsi olan dövlət qulluqçularına, elmlər namizədləri və doktorluq dərəcəsi olanlara, idman sahəsində xüsusi xidmətləri olan şəxslərə, həmçinin, maksimum üç il xidmət stajı olan hərbçilərə şamil edilir.
Güzəştli ipoteka krediti alan hər ailə bundan yalnız bir dəfə istifadə edə bilər.
Hazırda fondun xətti ilə AİF-in agent bankları vasitəsilə 240 milyon manat məbləğində 6 minə yaxın kredit verilib.
Azərbaycan İpoteka Fondu 2005-ci ilin sentyabrında Azərbaycan Prezidentinin fərmanı ilə dövlət təşkilatı qismində yaradılıb. Onun nizamnaməsi Prezidentin ayrıca fərmanı ilə 2005-ci ilin dekabrında təsdiq edilib. AİF-in əsas məqsədi Azərbaycan vətəndaşlarının uzunmüddətli maliyyələşdirmə vasitəsilə mənzillərlə təmin edilməsi üçün maliyyələşmə mexanizmlərinin yaradılmasından, eləcə də ipoteka kreditləşməsinə daxili və xarici investisiyaların cəlb edilməsindən ibarətdir.
Dekabrın 6-na rəsmi məzənnə 0,7995 AZN/USD təşkil edir.
