Azərbaycan, Bakı, 20 deklabr /Trend, müxbirlər T.Cəfərov, A.Bədəlova/
İqtisadi Əməkdaşlıq Təşkilatının (İƏT) Katibliyi ticarət və investisiyalar sahəsində təşkilatın təşəbbüslərində Azərbaycanın fəal iştirakına böyük önəm verir. Bu barədə İƏT-in baş katibi Məhəmməd Yəhya Mərufi bazar ertəsi Trend-ə müsahibəsində bildirib.
"Azərbaycan İƏT qrupunda beşinci ən iri ticarət tərəfdaşıdır, - Mərufi bildirib. - Biz həmçinin Azərbaycana ölkənin regional ticarət interqasiyasının mərkəzində olması üçün İƏT-in ticarət sazişinə qoşulmağı tövsiyə etmişik".
Mərufinin sözlərinə görə, Azərbaycan regional gömrük əməkdaşlığına kömək etmək üçün yaxşı vəziyyətdədir.
O deyib ki, İƏT-in Ticarət və İnkişaf Bankına və təkrar sığorta şirkətlərinə qoşulmaq ölkənin marağındadır. Onun sözlərinə görə, təşkilat bununla bağlı öz tövsiyələrini artıq Azərbaycan hökumətinə göndərib.
"Katiblik Azərbaycanın Ümumdünya Ticarət Təşkilatına (ÜTT) daxil olmasına yardım etmək üçün istənilən dəstək və köməyi təklif edib", - Mərufi bildirib.
İqtisadi Əməkdaşlıq Təşkilatı İran, Pakistan və Türkiyə tərəfindən 1985-ci ildə yaradılan İnkişaf üçün Regional Əməkdaşlıq Təşkilatının hüquqi varisi olan hökumətlərarası regional təşkilatdır. Təşkilatın tərkibinə Azərbaycan, Əfqanıstan, Tacikistan, Türkmənistan, Qazaxıstan, Qırğızıstan və Özbəkistan da daxildir.
Dekabrın 23-də İstanbulda təşkilatın dövlət və hökumət başçılarının 11-ci görüşü keçiriləcək. Görüşdən əvvəl dekabrın 21-22-də İstanbulda İƏT üzvü olan ölkələrin Nazirlər Şurasının görüşü və əsas vəzifəli şəxslərin yüksək səviyyədə iclası keçiriləcək.
Mərufinin sözlərinə görə, İƏT dövlət və hökumət başçılarının qarşıdakı 11-ci görüşü təşkilatın bir sıra sahələrdə, o cümlədən ticarət, nəqliyyat, kənd təsərrüfatı, ətraf mühit, narkotik maddələrin qanunsuz dövriyyəsinə nəzarət sahələrində qarşısına qoyulan məqsəd və vəzifələrdə əldə olunan uğurları qiymətləndirmək üçün forum olacaq.
"Əminəm ki, qarşıdakı sammitdəki qərarlar regionda sosial-iqtisadi inkişafın ümumi məqsədlərinə nail olmaq üçün regional inteqrasiyanın tərəqqisində mühüm rol oynayacaq", - Mərufi deyib.
